„Biseda për të ardhmen në 12:05“: Filipçe një herë tjetër sakrifikon shokun Jovica Radeski
Udhëheqja e LSDM-së po ngjan gjithnjë e më shumë me një sekt ku kushti kryesor për përkatësi është motoja – të gjithë të tjerët janë fajtorë për humbjet, vetëm Venko Filipçe nuk mban përgjegjësi për asgjë, thonë organizatorët e „Biseda për të ardhmen në 12:05“ si reagim ndaj konferencës për shtyp të kandidatit për kryetar komune nga LSDM në Komunën e Brvenicës, Jovica Radeski.
„Filipçe një herë tjetër e sakrifikon shokun Jovica Radeski. Sot, e kanë detyruar shokun Jovica Radeski të dalë në konferencë për shtyp vetëm sepse i urojmë për paraqitjen e tij dinjitoze në zgjedhje. I kanë kërkuar atij të dëshmojë besnikërinë. I kërkojmë falje që sot u detyrua të turpërohet publikisht, ndërsa në privat të kërkojë falje. Publikisht i bëjmë thirrje udhëheqjes të dalë me të paktën një emër dhe mbiemër që i përket „Bisedave për të ardhmen në 12:05“ që supozohet se ka bërë agjitacion kundër kandidatit të LSDM-së në Brvenicë“, thuhet në reagimin me shkrim.
Së fundi, vazhdon reagimi, nëse nga „Biseda për të ardhmen në 12:05“ varet nëse kandidatët e LSDM-së fitojnë, atëherë kjo udhëheqje partiake e çorientuar vetë pranon se duhet të largohet.
„Asnjë konferencë e detyruar për shtyp nuk mund të fshehë të vërtetën se Venko Filipçe është përfaqësuesi i marrëveshjes më të ndyrë politike në 35 vitet e fundit. Anëtarësia e ndershme po turpërohet gjithnjë e më shumë që udhëheqja aktuale i shërben Kristian Mickoskit“, thonë nga „Biseda për të ardhmen në 12:05“.
