DPM: Kur një grua ose vajzë denoncon dhunën, e më pas vritet, kjo nuk mund të trajtohet si një gabim i thjeshtë administrativ
Vrasja e vajzës 17-vjeçare në Bogdanci nuk është "një fatkeqësi tragjike", as "një lajm i tmerrshëm tjetër". Kjo është një kujtesë e ashpër për dështimin institucional dhe për kolapsin e sistemit që duhet të mbrojë qytetarët. Deri kur viktimat do të kërkojnë mbrojtje përmes labirinteve burokratike, ndërsa institucionet përgjegjëse trajtojnë denoncimet si statistikë të thjeshtë, pyesin nga DPM.
"Vajza më parë kishte denoncuar dhunën. Kërkoi ndihmë. Institucionet kishin njohuri për rastet e mëparshme të dhunës, megjithatë ajo nuk mori mbrojtje efektive. Jeta e saj përfundoi në një automjet të djegur. Cili është kuptimi i ligjeve, masave të mbrojtjes dhe shërbimeve që ekzistojnë vetëm në letër, nëse dhuna mund të eskalojë deri në këtë rezultat? Institucionet nuk duhet të fshihen pas frazës se "vepruan sipas protokollit". Kur një grua ose vajzë denoncon dhunë, e më pas vritet, kjo nuk mund të trajtohet si një gabim i thjeshtë administrativ", thonë nga partia.
DPM kërkon menjëherë, pa kompromis dhe në mënyrë transparente përcaktimin e përgjegjësisë institucionale të plotë: kush konkretisht në polici, prokurori dhe qendrën për punë sociale ka vepruar në këtë rast? Si është vlerësuar rreziku, a janë zbatuar dhe kontrolluar masat e mbrojtjes dhe pse ato nuk e kanë parandaluar rezultatin tragjik?
"Hetimi duhet të shqyrtojë të gjitha rrethanat dhe mundësitë e gabimeve në veprimet e institucioneve. Vdekja e të dyshuarit nuk duhet të nënkuptojë edhe fundin e përcaktimit të përgjegjësisë së zyrtarëve. Duhet të ketë pasoja për çdo person për të cilin do të provohet se me veprimet e tij të pakujdesshme ka kontribuar në këtë rezultat tragjik. Mjaft me njoftime boshe, premtime dhe dënime të shpejta që përsëriten pas çdo femicidi të ri. Çdo vrasje tjetër e një gruaje ose vajze është një akuzë e re kundër shtetit, i cili deklarativisht flet për barazi gjinore, por në praktikë dështon t'u sigurojë mbrojtje themelore atyre që kërkojnë ndihmë. DPM kërkon përgjegjësi. Kërkojmë rishikim urgjent të të gjitha denoncimeve aktive për dhunë familjare dhe të bazuar në gjini, përcaktim të përgjegjësisë individuale dhe masa konkrete për heqjen e gabimeve institucionale. Jo nesër, kur do të ketë një viktimë të re, por tani – për të shpëtuar një jetë", thonë nga DPM.
