KQZ për zgjedhjet për kryetar komune në Brvenicë: Jahij fitoi 4.442, ndërsa Radiçevski 4.177 vota
Kandidati i Aleancës Kombëtare për Integrim Arkin Jahij në raundin e dytë të zgjedhjeve për kryetar komune në Brvenicë ka fituar 4.442 vota, ndërsa kandidati i koalicionit të udhëhequr nga VMRO-DPMNE Stojanço Radiçevski 4.177 vota, njoftoi Komisioni Shtetëror i Zgjedhjeve në një konferencë për shtyp. Këto janë rezultatet fillestare jozyrtare të marra në mënyrë elektronike nga të gjitha 24 vendvotimet në dhjetë vendbanimet e komunës së Brvenicës.
Pjesëmarrja e votuesve është 54,29 për qind, që do të thotë se në votim dolën 8.820 votues.
Kryetari i KQZ-së Bojan Mariçiq në konferencën për shtyp deklaroi se votimi kaloi në një atmosferë të drejtë dhe demokratike.
Ankesat për votimin mund të dorëzohen deri të martën.
Paraqitësit e listave të kandidatëve kanë të drejtë të paraqesin ankesa në KQZ për procedurën e votimit brenda 48 orëve pas përfundimit të votimit. Ankesat mund të dorëzohen së fundmi deri të martën, më 3 nëntor deri në orën 19:00. KQZ është e detyruar që brenda 72 orëve nga marrja të marrë vendim lidhur me ankesën, ndërsa kundër vendimit të KQZ-së paraqitësi i ankesës mund të parashtrojë padi në Gjykatën Administrative brenda 24 orëve nga marrja e vendimit. Gjykata Administrative është e detyruar të marrë vendim brenda 48 orëve nga marrja e ankesës.
KQZ do të publikojë rezultatet përfundimtare të zgjedhjeve menjëherë, por jo më vonë se 24 orë pas përfundimit të tyre dhe kjo do të thotë 24 orë pas përfundimit të të gjithë procedurës së ankesave.
– Presim procesverbalet nga të gjitha vendvotimet dhe nesër gjatë ditës do të caktojmë mbledhje për shpalljen e rezultateve fillestare zyrtare – paralajmëroi Mariçiq në konferencën për shtyp.
