20-vjeçar në paraburgim për sulm ndaj të miturit para “Jane Sandanski”

Prokuroria Themelore Publike Shkup nisi procedurë kundër një 20-vjeçari të dyshuar për dhunë gjatë një konflikti mes grupeve të tifozëve para qendrës sportive “Jane Sandanski”. Gjykata Penale caktoi paraburgim prej 30 ditësh.

Prokuroria kërkoi paraburgim për shkak të rrezikut nga arratia, mundësisë që i dyshuari të ndikojë mbi dëshmitarët që duhet të dëgjohen, si dhe rrezikut nga përsëritja e veprës penale. Gjykata pranoi propozimin e prokurorit publik.

Sipas të dhënave në hetim, gjatë konfliktit mes grupeve të tifozëve para hyrjes së qendrës sportive, i dyshuari i dha një goditje në kokë një të mituri nga grupi kundërshtar i tifozëve. Nga goditja fëmija humbi ndjenjat dhe ra në tokë, pas së cilës u dërgua me kontuzion në kokë në Qendrën Klinike “Nëna Terezë”.

Kundër 20-vjeçarit po zhvillohet procedurë për veprën penale “Dhunë” sipas nenit 386 paragrafi 6 në lidhje me paragrafët 4 dhe 1 të Kodit Penal.