I lidhnin, i rrihnin deri në vdekje dhe u plaçkitnin shtëpitë në Hrom dhe Gjorçe Petrov

Katër persona janë dyshuar për dy plaçkitje të rënda në lagjet e Shkupit, Hrom dhe Gjorçe Petrov, ku u vranë pronarët e shtëpive. Të dyshuarit sulmuan viktimat, i lidhën dhe i mbytën, pastaj plaçkitën shtëpitë, duke marrë para, bizhuteri prej ari dhe sende me vlerë.

Prokuroria Themelore Publike e Shkupit ka hapur hetim kundër katër personave, për të cilët ekziston dyshim i bazuar se së bashku kryen dy vepra penale të plaçkitjes me pasoja vdekjeprurëse. Bëhet fjalë për formën më të rëndë të kësaj vepre penale, për të cilën parashikohet dënim me burg prej së paku 10 vjetësh ose burgim të përjetshëm.

Sulmi i parë ndodhi në orët e hershme të mëngjesit më 22 tetor, kur të dyshuarit hynë me forcë në një shtëpi në Hrom. Pronarin e lidhën për duar dhe këmbë, e goditën në kokë dhe trup, pastaj e mbytën me jastëk. Nga shtëpia morën para dhe bizhuteri ari në vlerë rreth 300.000 denarë.

Të njëjtën ditë pasdite, njëri nga të dyshuarit i çoi të tjerët me veturën e tij në një dyqan bizhuterish në Çarshinë e Vjetër të Shkupit, ku bizhuteritë e vjedhura i shitën për 2.840 euro.

Plaçkitja e dytë ndodhi natën ndërmjet 26 dhe 27 tetorit në një shtëpi në Gjorçe Petrov. Të dyshuarit sulmuan fizikisht pronaren, e goditën në kokë dhe trup, i lidhën duart, këmbët dhe gojën, pastaj e çuan në banjo. Gruaja vdiq nga plagët e marra.

Nga shtëpia morën para, bizhuteri dhe sende me vlerë në vlerë totale rreth 200.000 denarë. Edhe këtë herë bizhuteritë e vjedhura i shitën.

Prokuroria kërkoi paraburgim për të katër të dyshuarit. Gjykata Penale më parë sot konfirmoi se paraburgimi i të dyshuarve u është zgjatur për 30 ditë, me propozim të prokurorisë.