Modernizimi i Ushtrisë dhe përballja me kërcënimet hibride në fokus të takimit mes Siljanovska-Davkova dhe gjeneralit Grinkevich
Presidentja Gordana Siljanovska-Davkova, si Komandante Supreme e forcave të armatosura, e shoqëruar nga ambasadori maqedonas në NATO, Murtezani, dhe shefi i Shtabit të Përgjithshëm, gjeneral-major Lafçiski, në selinë e Komandës Supreme të forcave aleate në Evropë, zhvilloi një takim me gjeneralin Aleksus Gregori Grinkevich, komandantin suprem aleat për Evropën.
Siljanovska-Davkova riafirmoi përkushtimin e vendit ndaj mbrojtjes kolektive dhe kontributit ndaj sigurisë së aleatëve, duke theksuar se stabiliteti i Ballkanit Perëndimor është i pandashëm nga siguria e komunitetit më të gjerë euroatlantik. Sipas presidentes, integrimi i plotë euroatlantik dhe anëtarësimi i vendeve të Ballkanit Perëndimor në BE është një pjesë e rëndësishme e strukturës së sigurisë evropiane.
Ajo vuri në dukje se moszgjidhja e konflikteve, tensionet politike dhe cenueshmëria institucionale e bëjnë rajonin të ekspozuar ndaj kërcënimeve hibride, dezinformatave dhe ndikimeve të dëmshme të jashtme, për çka janë të nevojshme rezistencë më e madhe, gatishmëri për situata krize dhe mbrojtje e infrastrukturës kritike.
Sipas saj, prania e vazhdueshme e KFOR-it dhe misioneve të tjera të NATO-s është thelbësore për paqen dhe stabilitetin e Kosovës dhe rajonit më të gjerë.
Presidentja kujtoi se vendi është i përkushtuar në zhvillimin e kapaciteteve mbrojtëse në përputhje me objektivat e NATO-s, ku aktualisht po përditësohen dokumentet strategjike për mbrojtjen dhe zhvillimin afatgjatë të kapaciteteve të Ushtrisë.
Sipas saj, modernizimi nuk nënkupton vetëm blerjen e pajisjeve moderne, por edhe planifikim të kujdesshëm, investime afatgjata dhe bashkëpunim të ngushtë me aleatët, të harmonizuar me nevojat e Ushtrisë dhe kërkesat e Aleancës.
Ajo veçoi veçanërisht Korridoret 8 dhe 10, duke theksuar se pozicioni i tyre gjeografik dhe lidhja infrastrukturore janë të rëndësishme për realizimin e misionit të Aleancës.
Ajo theksoi se vendi angazhohet për respektimin e sovranitetit, pavarësisë dhe integritetit territorial të Ukrainës, në përputhje me të drejtën ndërkombëtare dhe Kartën e Kombeve të Bashkuara, duke shprehur gatishmërinë për vazhdimin e bashkëpunimit me aleatët brenda mekanizmave të përbashkëta të ndihmës.
Në fund, presidentja konfirmoi angazhimin maqedonas për të qenë një aleat i besueshëm dhe konstruktiv, duke kontribuar në mbrojtjen kolektive, paqen rajonale dhe sigurinë e komunitetit euroatlantik.
