Orce dhe VMRO-DPMNE sërish i lanë viktimat e dhunës në familje në baltë, nuk siguruan subvencionet e premtuara për qiratë, thonë nga Levica
Grupi këshilltar i Levicës në Këshillin e Qytetit të Shkupit reagoi sërish për moszbatimin e iniciativës së miratuar për subvencionimin e qirave për viktimat e dhunës në familje. Edhe pse në qershor Këshilli e pranoi iniciativën, dhe kryetari i qytetit Orce Gjorgjievski e vlerësoi publikisht si të shkëlqyer dhe njoftoi formimin e një grupi pune dhe sigurimin e mjeteve në rishikimin e ardhshëm të buxhetit, deri më sot nuk është ndërmarrë asnjë hap konkret për realizimin e saj, thonë nga partia.
Kaluan pesë muaj dhe dy rishikime të buxhetit të qytetit, por mjetet për këtë masë ende nuk janë parashikuar, theksojnë ata. Këshilltarja Evgenija Stankoska theksoi se për pyetjen e saj këshilltare lidhur me arsyet pse iniciativa nuk u përfshi në rishikimin e mëparshëm, nuk ka marrë asnjë përgjigje, edhe pse afati ligjor për përgjigje prej 30 ditësh ka kaluar tashmë.
Stankoska paralajmëroi se varësia ekonomike dhe mungesa e mjeteve financiare për sigurimin e strehimit të pavarur janë ndër arsyet kryesore pse gratë mbeten në mjedise familjare me dhunë. Subvencionimi i qirave përbën një mekanizëm konkret me të cilin Qyteti i Shkupit mund t’u mundësojë viktimave të lënë pas shtëpinë me dhunë dhe të fillojnë një jetë të sigurt për veten dhe fëmijët e tyre.
Kjo iniciativë, vlerëson ajo, fiton peshë shtesë në kushte të rritjes së vazhdueshme të dhunës në familje dhe rasteve të reja të femicidit në vend.
Pas vrasjes brutale të Biljanës 17-vjeçare nga Bogdanci, e cila më parë kishte raportuar disa herë për dhunë nga partneri i saj, Stankoska kujtoi se institucionet duhet të ndalojnë me dënojnë deklarativisht dhunën dhe të marrin masa konkrete parandaluese.
Levica kërkon që kryetari i qytetit Orce Gjorgjievski dhe shumica këshilltare e udhëhequr nga VMRO-DPMNE të përmbushin premtimin e dhënë dhe të parashikojnë mjete për subvencionimin e qirave në Buxhetin e Qytetit të Shkupit për vitin 2027. Nëse ka vërejtje lidhur me shumën e subvencioneve ose mënyrën e zbatimit të tyre, Levica, theksojnë ata, është e gatshme të hapë sërish diskutim dhe të ofrojë zgjidhje.
„Mbrojtja e grave nga dhuna në familje nuk duhet të mbetet vetëm në përpjekje deklarative. Kur ekziston një iniciativë konkrete, mbështetje e miratuar dhe mundësi reale për ndihmë, injorimi i saj është papërgjegjësi politike dhe institucionale. Gratë nuk kanë kohë për një premtim bosh tjetër“.
