Shasivari: Mbështetje e fortë nga Greqia për integrimin evropian dhe reformat në drejtësi

Greqia jep mbështetje të fortë për shtetin tonë në rrugën drejt anëtarësimit në Bashkimin Evropian. Kjo u konfirmua në takimin mes ministrit të drejtësisë, Jeton Shasivari, dhe ambasadorit të ri të Greqisë, Ioanis Malukos, ku u theksua rëndësia e perspektivës evropiane dhe thellimit të mëtejshëm të bashkëpunimit dypalësh.

Në takim, pala greke shprehu gatishmërinë për mbështetje pa kushte të reformave në drejtësi, përmes ndarjes së përvojave, sigurimit të ndihmës ekspertë dhe forcimit të bashkëpunimit mes institucioneve përgjegjëse.

Ministri Shasivari shprehu falënderim për mbështetjen e fortë dhe të vazhdueshme nga Greqia, duke theksuar se reformat në drejtësi, forcimi i sundimit të ligjit dhe përshtatja me standardet evropiane mbeten ndër prioritetet kryesore të Ministrisë së Drejtësisë.

Të dy bashkëbiseduesit konfirmuan angazhimin e përbashkët për avancimin e bashkëpunimit dhe për mbështetje konkrete të proceseve reformuese që janë thelbësore për të ardhmen evropiane të shtetit tonë.