Siļanovska-Davkova në Budapest u takua me përfaqësues të diasporës maqedonase

Kryetarja Gordana Siļanovska-Davkova, e cila ndodhet në Budapest për nder të 70-vjetorit të Revolucionit Hungarez të vitit 1956, këtë mëngjes u takua me përfaqësues të diasporës maqedonase.

Në takim morën pjesë figura të shquara nga fusha e biznesit, shkencës, arsimit, teknologjive informative, si dhe studentë.

Ata e njohën kryetaren me rolin dhe angazhimin e tyre në jetën shoqërore të Hungarisë, si dhe me gjendjen aktuale në vend.

Biseduesit shprehën dëshirën për forcimin e marrëdhënieve maqedono-hungareze. Ata dhanë propozime për promovimin e shtetit para opinionit hungarez dhe për një njohje më të mirë kulturore reciproke, duke theksuar veçanërisht mundësitë për zhvillimin e turizmit. Ata theksuan nevojën për hapjen e qendrave kulturore në të dy shtetet.

Për Siļanovska-Davkovën, komunikimi i vazhdueshëm me diasporën, përmes përfaqësive diplomatike maqedonase, është veçanërisht i rëndësishëm për bashkëpunimin dhe afirmimin e atdheut.

Kryetarja shprehu kënaqësi për konsolidimin dhe njohjen e diasporës së vogël maqedonase në shoqërinë hungareze.

Ajo theksoi rëndësinë e diplomacisë kulturore dhe përshëndeti përkushtimin dhe aktivitetin e tyre lidhur me ruajtjen e gjuhës, kulturës dhe traditës maqedonase.