Vetëm tetë nga 100 gra rome janë të punësuara, varësia ekonomike i ekspozon ato ndaj rrezikut më të madh nga dhuna
Arsimi i paplotësuar, qasja e vështirë në punësim dhe varësia ekonomike i vendosin gratë rome në një pozitë veçanërisht të cenueshme. Mungesa e të ardhurave të tyre për shumë prej tyre do të thotë edhe mundësi të kufizuara për të lënë mjedisin ku janë të ekspozuara ndaj dhunës. Për më tepër, diskriminimi ndjehet gjatë kërkimit të punës, në institucionet shëndetësore dhe në sistemin arsimor.
Sabina Asanova, kryetare e Shoqatës Rom „Rodop“ nga Shtipi, thotë se frika, mungesa e sigurisë financiare dhe mungesa e mbështetjes i demoralizojnë gratë që të kërkojnë ndihmë.
„Një pjesë e madhe e grave që përjetojnë dhunë tërhiqen dhe nuk kanë guxim të denoncojnë, sepse nuk kanë mbështetje dhe nuk dinë ku të drejtohen. Pjesa financiare është problemi më i madh për ta, po ashtu edhe strehimi. Nuk kanë ku të kthehen. I bëj apel të gjitha grave rome që të guxojnë, të denoncojnë, të arsimohen, të bëhen pjesë e shoqërisë, të punësohen, të përfshihen në tregun e punës dhe gjithmonë të jenë ekonomikisht të pavarura“, thotë Asanova.
Brenda projektit janë përfshirë edhe ekspertë. Psikologia Vesna Trajkovska thekson se roli i institucioneve është veçanërisht i rëndësishëm në sigurimin e mbrojtjes dhe krijimin e kushteve në të cilat viktimat nuk do të lihen vetëm të përballen me pasojat e dhunës.
„Mendojmë se, para së gjithash, ngritja e vetëdijes është hapi i parë i rëndësishëm për parandalimin dhe reagimin në rastet e dhunës në familje. Por, gjithashtu, është e rëndësishme që të gjithë të ofrojmë mbështetje institucionale dhe jashtëinstitucionale për viktimat e dhunës, secili në mënyrën e vet dhe brenda mundësive të veta“, tha Trajkovska.
Sipas të dhënave të Komisionit për Parandalimin dhe Mbrojtjen nga Diskriminimi, në periudhën nga viti 2022 deri në 2024 janë punësuar vetëm tetë nga 100 gra rome. Arsimi i paplotësuar dhe varfëria mbeten pengesat kryesore për përfshirjen e tyre në tregun e punës.
