(Video) Mickoski shpalli fitore të thellë në Brvenica: „Dallimi është mbi 4 me 1, më 1 nëntor shkojmë për fitore të përgjithshme“
Kryetari i VMRO-DPMNE-së dhe kryeministri, Hristijan Mickoski, sonte shpalli fitore të thellë për kandidatin e partisë, Stojançe Radiçevski, në raundin e parë të zgjedhjeve të parakohshme për kryetar të Komunës së Brvenicës. Mickoski vlerësoi se dallimi në krahasim me kandidatin e LSDM-së është më i madh se katër me një.
„VMRO-DPMNE është bindshëm e para dhe ka fitore të madhe në raundin e parë të zgjedhjeve për zgjedhjen e kryetarit të Komunës së Brvenicës. Kandidati ynë Stojançe Radiçevski fitoi shumicë të madhe të votave, ndërsa dallimi në krahasim me konkurrentët tanë nga LSDM është më i madh se 4 me 1“, deklaroi Mickoski.
Ai bëri një krahasim me zgjedhjet e përsëritura për kryetar në Mavrovë dhe Rostushë, ku, siç tha, VMRO-DPMNE fitoi me një dallim më të madh se dy me një.
Mickoski iu referua edhe paralajmërimeve të mëparshme nga drejtuesit e LSDM-së për fitore të thellë në Brvenicë, duke vlerësuar se rezultati përbën një mesazh nga qytetarët për partinë opozitare.
„Edhe pse vetëm para disa ditësh drejtuesit e LSDM-së paralajmëronin fitore të thellë në Brvenicë, megjithatë LSDM-ja është deklasuar nga qytetarët dhe kjo është një mesazh i rëndësishëm nga qytetarët për drejtuesit e tyre“, tha ai.
Mickoski pret raund të dytë
Megjithë shpalljen e fitore, Mickoski vlerësoi se për shkak të numrit më të madh të kandidatëve në garën zgjedhore është shumë e mundshme të ketë raund të dytë.
Sipas analizave të VMRO-DPMNE-së që ai prezantoi, Radiçevski ka marrë rreth 3.000 vota, kandidati i DUI-së është i dyti me pak më shumë se 2.100 vota, pas tij është kandidati i VREDA-s, ndërsa i katërti është kandidati i LSDM-së. Kandidati i pavarur i mbështetur nga Levica, sipas Mickoskit, ka marrë rreth 50 vota.
„Nga vullneti i popullit nuk ka ikje dhe ai është gjykatësi i pakontestueshëm“, theksoi lideri i VMRO-DPMNE-së.
Ai falënderoi qytetarët që e realizuan të drejtën e votës, si dhe të gjithë ata që ishin të përfshirë në organizimin dhe realizimin e procesit zgjedhor.
„Demokracia nënkupton garë të ideve, programeve dhe kandidatëve të ndryshëm. Por, kur përfundon votimi, mbetet një detyrë që vlen për të gjithë: të respektohet vullneti i qytetarëve“, tha Mickoski.
„Rezultati është konfirmim i politikës së Qeverisë“
Sipas Mickoskit, rezultati zgjedhor në Brvenicë ka edhe një kuptim më të gjerë politik dhe përbën konfirmim se qytetarët mbështesin politikën e VMRO-DPMNE-së dhe Qeverisë.
„Politika e projekteve konkrete, e përmbushjes së premtimeve dhe e marrjes së përgjegjësive për detyrimet e ndërmarra“, tha Mickoski, duke shtuar se besimi i fituar është nxitje për partinë që të vazhdojë punën.
Ai pranoi se qytetarët kanë pritshmëri të mëdha dhe se ende ka probleme që duhet të zgjidhen, prandaj paralajmëroi vazhdimin e investimeve në komunat.
„Qeveria do të vazhdojë të investojë në zhvillimin e komunave. Në rrugë, ujësjellës, shkolla, infrastrukturë komunale dhe krijimin e kushteve më të mira për jetesë. Kjo vlen edhe, natyrisht, për Brvenicën“, theksoi kryeministri.
Mickoski theksoi se investimet në Brvenicë do të vazhdojnë me prioritete të qarta dhe përgjegjësi më të madhe.
Thirrje për mbështetje para raundit të dytë
Mickoski shprehu respekt edhe për kandidatët e tjerë që morën pjesë në zgjedhje, duke theksuar se secili prej tyre pati mundësinë të paraqesë vizionin e tij për komunën.
Ai theksoi se Brvenica është shtëpi e qytetarëve me përkatësi të ndryshme kombëtare, fetare dhe politike dhe se kryetari i ardhshëm i komunës duhet të punojë për të gjithë.
„Pavarësisht nga rezultati i garës politike, detyra më e rëndësishme e kryetarit të ardhshëm do të jetë të punojë për të gjithë“, tha Mickoski.
Para raundit të dytë, i caktuar për 1 nëntor, ai paralajmëroi se VMRO-DPMNE do të kërkojë mbështetje nga të gjithë qytetarët e Brvenicës, me theks në investime të reja, infrastrukturë më të mirë, zgjidhjen e problemeve komunale dhe krijimin e më shumë mundësive për të rinjtë.
„Fitorja është e madhe, por edhe detyrat tona për këtë komunë janë të mëdha. Me projekte konkrete. Me përgjegjësi. Me respekt për çdo njeri. Për një Brvenicë për të gjithë“, përfundoi Mickoski duke bërë thirrjen: „Shkojmë për fitore të përgjithshme!“
