Bellingham e zgjat kontratën me Realin

Jude Bellingham do të mbajë fanellën e Real Madridit për shumë kohë. Futbollisti anglez dhe gjiganti madrilen arritën një marrëveshje për zgjatjen e bashkëpunimit deri më 30 qershor 2031, që konfirmon se klubi llogarit në një nga lojtarët e tij më të rëndësishëm për vitet që vijnë, raporton "AS".

Bellingham mbërriti në "Santiago Bernabeu" në verën e vitit 2023 nga Borussia Dortmund, dhe kontrata e nënshkruar atëherë ishte e vlefshme deri në fund të sezonit 2028/29.

Me kontratën e re, bashkëpunimi u zgjat për dy vjet shtesë, ndërsa reprezentuesi anglez do të marrë edhe kushte financiare më të mira.

Që nga ardhja në Madrid, Bellingham ka treguar se ka cilësi për të qenë shumë më tepër se një futbollist i shkëlqyer.

Me lojërat, karakterin dhe ndikimin tek shokët e skuadrës, ai u konsolidua si një nga liderët potencialë të brezit të ri të Real Madridit.

Negociatat për zgjatjen e kontratës filluan drejt fundit të sezonit të kaluar, dhe sipas informacioneve nga Spanja, marrëveshja u arrit pa vështirësi të mëdha.

Bellingham po identifikohet gjithnjë e më shumë me klubin dhe jetën në Madrid, ndërsa tifozët e vlerësojnë lart qëndrimin e tij ndaj fanellës, përkushtimin në fushë dhe aftësinë për të motivuar të gjithë ekipin me shembullin e tij.

Foto/ Depositphotos