Euroliga dëshiron të blejë Ligën ABA
Udhëheqësit e Euroligës shprehën dëshirën të bëhen pronarë shumicë të Ligës ABA.
Euroliga po mendon të hyjë në strukturën pronësore të Ligës ABA, me mundësinë që në të ardhmen të bëhet pronari shumicë i saj, transmetojnë mediat serbe.
Kjo temë ishte në qendër të vëmendjes në takimin e udhëheqësve të Euroligës dhe përfaqësuesve të klubeve pronare të Ligës ABA.
Sipas informacioneve, përfaqësuesve të garës rajonale iu prezantua qëllimi që Euroliga në të ardhmen e afërt të marrë pjesë në pronësinë e Ligës ABA, dhe potencialisht edhe kontrollin shumicë.
Me insistimin e përfaqësuesve të Euroligës, në takim morën pjesë edhe udhëheqësit e Dubait dhe Kluzhit, megjithëse klubet e tyre formalish nuk i përkasin grupit të pronarëve të Ligës ABA. Prania e tyre tregon se Euroliga i sheh si partnerë të rëndësishëm në planet afatgjata për zhvillimin e basketbollit evropian.
Zgjerimi i paralajmëruar i ligës NBA në tregun evropian përshpejtoi aktivitetet e Euroligës, e cila dëshiron të forcojë pozicionin e saj dhe të lidhë sa më shumë klube me traditë të gjatë dhe bazë të madhe tifozësh.
Planet përfshijnë zgjerimin e garës, futjen e modelit të franšizës dhe lidhjen më të ngushtë të Eurokupit me klubet që marrin pjesë rregullisht në garë.
Liga ABA është një zgjedhje logjike, duke pasur parasysh bashkëpunimin afatgjatë me Euroligën dhe faktin se ajo është rritur nga një garë rajonale në një faktor të rëndësishëm në basketbollin evropian.
Sidoqoftë, ende është herët për të folur për një model konkret të bashkëpunimit të ardhshëm. Për momentin bëhet fjalë për diskutime fillestare, jo për negociata të përfunduara, prandaj mbetet e panjohur se si do të dukej ndryshimi eventual në strukturën pronësore dhe çfarë të drejta do të kishte Euroliga.
Një marrëveshje e mundshme është paralajmëruar edhe nga ndryshimet në drejtimin e Ligës ABA gjatë verës. Persona me përvojë shumëvjeçare në Euroligë janë emëruar në pozicione të rëndësishme.
Ibrahim Erkan u emërua drejtor sportiv i Ligës ABA, ndërsa Miguel Anhel Perez u bë kryetar i Komisionit të Arbitrave. Sipas informacioneve të mediave, të dy kanë një rol të rëndësishëm në bisedat midis dy organizatave.
Nëse planet realizohen, basketbolli rajonal mund të hyjë në një fazë të re zhvillimi, ku Euroliga do të kishte ndikim shumë më të madh mbi Ligën ABA. Megjithatë, për momentin mbetet të shihet nëse bisedat fillestare do të kthehen në një marrëveshje konkrete.
Foto/ aba league
