Tenisti serb i pezulluar për 24 vjet: Dënimi është 14 herë më i madh se ajo që ka fituar

Tenisti serb Stefan Miliçevic është pezulluar për 24 vjet pasi Agjencia Ndërkombëtare për Integritetin e Tenisit (ITIA) ka konstatuar se ai ka marrë pjesë në manipulim ndeshjesh dhe ka tentuar të përfshijë edhe lojtarë të tjerë në rrjetin e korruptuar.

Miliçevic, i cili dikur ishte tenisti i 1,338-të në botë, nuk do të ketë të drejtë të garojë deri në vitin 2050.

Sipas njoftimit të ITIA-së, është zbuluar se ai ka manipuluar gjashtë ndeshje midis viteve 2022 dhe 2024, ndërsa ka tentuar të manipulojë edhe gjashtë të tjera. Në pesë nga gjashtë rastet e konfirmuara, ai vetë ka marrë pjesë në fushë.

Gjatë periudhës 2022 deri 2024, Miliçevic ka luajtur gjithsej 11 ndeshje profesionale, të gjitha në nivelin e tretë të tenisit profesional.

ITIA pretendon se Miliçevic ka rekrutuar ose ka tentuar të rekrutojë lojtarë të tjerë si pjesë e një rrjeti të korruptuar, që ka çuar në përfshirjen e një numri të madh tenistësh të tjerë në manipulim.

Sipas ITIA-së, tenisti serb nuk ka bashkëpunuar as gjatë hetimit të kryer në vitin 2026. Agjencia pretendon se ka tentuar shtatë herë të marrë përgjigje nga ai, përmes kanaleve të ndryshme.

Për këtë arsye, rasti i tij madje nuk ka arritur te zyrtari për dëgjimet anti-korrupsion. Miliçevic nuk ka reaguar ndaj akuzave as ndaj njoftimit për shkelje serioze që i është dërguar më 24 shtator, prandaj dënimi është dhënë automatikisht pa vendim me shkrim nga dëgjimi.

Përveç pezullimit deri në vitin 2050, ai është gjobitur edhe me 70,000 dollarë.

Është veçanërisht interesante që tenisti serb ka fituar vetëm 4,858 dollarë nga çmimet e turneve gjatë gjithë karrierës së tij profesionale, që do të thotë se dënimi është pothuajse 14.5 herë më i madh se të ardhurat e tij totale në fushë.

Një përfaqësues i ITIA-së ka deklaruar se kohëzgjatja e pezullimit i detyrohet seriozitetit të shkeljes, numrit të ndeshjeve të manipuluara dhe përpjekjeve për përfshirjen e lojtarëve të tjerë në këtë histori, dhe jo refuzimit të tij për të bashkëpunuar gjatë hetimit.

Miliçevic më parë ka luajtur tenis kolegjial në Universitetin e Minesotës, dhe ka punuar edhe si trajner në Universitetin DePaul në Çikago.

Pezullimi i Miliçevicit i ndalon jo vetëm lojën, por edhe stërvitjen dhe pjesëmarrjen në turne të sponsorizuara nga ATP, WTA, turnetë Grand Slam dhe asociacionet kombëtare të tenisit.

Foto/ Depositphotos