Trajneri dënohet me 90 vjet burg për pornografi fëmijësh
Sean Gardner, një amerikan që dikur ishte trajner i shquar i gjimnastikës për sportistë të rinj, u dënua me 90 vjet burg për regjistrimin sekret të sportistëve të tij të rinj ndërsa ndryshoheshin dhe përdornin tualetin në palestër në Mississippi.
Gjykatësja federale amerikane, Kristi Johnson, e dënoi 39-vjeçarin Gardner me dënimin maksimal të mundshëm për tre pika për prodhimin e pornografisë me fëmijë.
Gardner pranoi fajësinë për vendosjen e një kamere të fshehtë në tualetin e sallës së gjimnastikës në Purvis, Mississippi, midis dhjetorit 2017 dhe prillit 2018, për të regjistruar nxënëset e tij.
Hetuesit thonë se ai bëri video afër të paktën 10 vajzave të mitura ndërsa ishin lakuriq ose duke u zhveshur; ky material nuk u zbulua në kompjuterët e tij deri disa vite më vonë, ndërsa autoritetet hetuan akuza për sulm seksual ndaj gjimnasteve në Iowa.
Hetuesit sekuestruan rreth 50 video dhe 400 fotografi si prova. Arrestimi i Gardner nga FBI verën e kaluar risolli në vëmendje pyetjet nëse organizatat amerikane të gjimnastikës kishin bërë mjaftueshëm për të mbrojtur sportistet nga keqpërdorimi seksual nga një trajner me pushtet.
Një nga ish-nxënëset e tij tha për "CBS News" se Gardner ishte karizmatik dhe se në atë kohë ishte aq e re sa nuk kuptonte se sjellja e trajnerit të saj, veçanërisht në fund të stërvitjes, ishte e papërshtatshme.
"Secili prej nesh prisnim për një përqafim, dhe ai na puthte në ballë dhe na përkëdhelte në prapanicë", tha Liberty Rains, e cila ishte 11 vjeçe kur filloi të stërvitej në klubin "Jam in Gymnastics" në Purvis.
Foto/ Depositphotos
