Rënie e paprecedent që nga viti 2012: Shitjet e telefonave bien, ndërsa çmimet rriten për 20%
Dorëzimet e telefonave inteligjentë ranë në nivelin më të ulët që nga viti 2012.
Dorëzimet globale të telefonave inteligjentë u ulën me 20 për qind në bazë vjetore në tremujorin e tretë të vitit 2026, duke arritur nivelin më të ulët për atë periudhë që nga viti 2012. Sipas të dhënave paraprake të "Counterpoint Research", mungesa e çipave të memories dhe rritja e papritur e çmimeve të tyre çuan në rritjen e kostove të prodhimit dhe në kufizimin e ofertës.
Çmimet e komponentëve të memories DRAM dhe NAND u rritën ndjeshëm për shkak të kërkesës së madhe lidhur me zhvillimin e infrastrukturës për inteligjencën artificiale, raporton "Reuters".
Prodhuesit e telefonave kaluan një pjesë të këtyre kostove të rritura tek konsumatorët; si rezultat, çmimet me pakicë të telefonave inteligjentë në mbarë botën u rritën rreth 20 për qind që nga fillimi i vitit, sipas vlerësimeve të "Counterpoint".
"Mungesa ekstreme e memories po ndryshon edhe strategjitë e prodhuesve dhe sjelljen e konsumatorëve", deklaroi Shipra Jain, analiste e lartë në "Counterpoint".
Konsumatorët mbajnë pajisjet e tyre ekzistuese për më shumë kohë, po mendojnë gjithnjë e më shumë për blerjen e telefonave të rinovuar dhe po zgjedhin modele të klasës së lartë, ndërsa prodhuesit përshtatin ofertat dhe çmimet e tyre për të mbrojtur fitueshmërinë.
"Samsung" mbajti pozicionin e saj udhëheqës me një pjesë prej 23 për qind të tregut global, pavarësisht rënies së dorëzimeve me tre për qind krahasuar me të njëjtën periudhë të vitit të kaluar.
Kompania përfitoi nga kërkesa e fortë fillestare për modelet e saj të palosshme nga seria "Galaxy" (modeli "Galaxy Z Fold8"), si dhe nga oferta më e qëndrueshme e komponentëve për pajisjet e klasës së mesme. Pjesa e tregut të "Apple" arriti në 22 për qind në tremujorin e tretë – duke kaluar një të pestën e tregut për herë të parë – megjithëse dorëzimet e kompanisë u ulën.
Këtë volum e ndikoi mungesa e modelit bazë "iPhone 18"; si pasojë, oferta fillestare drejt kanaleve të shitjes ishte më e vogël se një vit më parë, kur u lançua e gjithë seria "iPhone 17".
Kompania kineze "Xiaomi" regjistroi një rënie të dorëzimeve prej më shumë se 30 për qind, ndërsa pjesa e saj e tregut u ul në 10 për qind.
Kompania kufizoi ofertën e pajisjeve më të lira dhe u tërhoq nga disa tregje të huaja më pak të rëndësishme për të shmangur shitjet me margjina shumë të ulëta fitimi. Oppo dhe Vivo regjistruan rënie të dorëzimeve mbi 20 për qind, me pjesë tregu përkatësisht në nëntë për qind dhe tetë për qind.
Counterpoint vlerëson se tregu do të mbetet nën presion deri në fund të vitit, pasi prodhuesit tani i japin përparësi fitueshmërisë mbi numrin e pajisjeve të dorëzuara.
