Zuckerberg lëshoi një "plumb topi": Arrin AI që mban mend dhe korrigjon gabimet e veta
Meta prezantoi modelet e inteligjencës artificiale „Muse Wonder“ dhe „Muse Wonder Full“, të cilat karakterizohen me "memorie aktive" dhe zgjidhje autonome të gabimeve.
Kompania amerikane teknologjike Meta prezantoi modele të reja të inteligjencës artificiale, „Muse Wonder“ dhe „Muse Wonder Full“, duke pohuar se ato mund të konkurrojnë me sistemet më të avancuara të kompanive OpenAI dhe Anthropic.
Kjo është pjesë e përpjekjeve të Meta për të forcuar pozicionin e saj në garën globale për zhvillimin e inteligjencës artificiale, raporton Reuters.
Meta thekson se modelet e reja janë të dizajnuara për detyra komplekse që inteligjenca artificiale mund t’i kryejë në emër të përdoruesve, duke përfshirë punën me dokumente ligjore dhe financiare, interpretimin e kontratave, zgjidhjen e çështjeve të sigurimeve, si dhe zhvillimin e softuerit.
Kompania pretendon se, sipas disa testeve, këto modele janë në nivel me sistemet kryesore; megjithatë, këto vlerësime bazohen në evaluimet e brendshme të Meta-s.
Modeli „Muse Wonder“ është në dispozicion për programuesit përmes platformës „Meta Model API“ dhe mjetit programor „Muse Code“, ndërsa versioni më i avancuar, „Muse Wonder Full“, aktualisht është i dedikuar për abonentët e shërbimit „Muse Code“.
Meta planifikon në të ardhmen e afërt të integrojë modelin e ri në asistentin e saj personal AI „Muse“ – fillimisht për abonentët.
Një nga inovacionet kryesore është funksioni „memorie aktive“, i cili i mundëson modelit të ruajë informacione të rëndësishme nga bisedat e mëparshme dhe t’i aplikojë ato në kryerjen e detyrave të ardhshme.
Funksioni „fokus aktiv“ është dizajnuar për t’i mundësuar modelit të punojë në detyra komplekse për periudha më të gjata kohore, të përshtatë qasjen e tij kur has pengesa dhe të vazhdojë punën pas ndonjë gabimi.
Prezantimi i modeleve të reja përbën një hap të rëndësishëm në riformatimin e strategjisë së Meta për zhvillimin e inteligjencës artificiale, pas vendimit të drejtorit ekzekutiv Mark Zuckerberg për të investuar miliarda dollarë në infrastrukturë kompjuterike dhe për të angazhuar ekspertë që ndihmojnë kompaninë të arrijë konkurrentët e saj.
Meta deklaroi se modelet e reja janë zhvilluar me theks të veçantë në sigurinë dhe privatësinë e të dhënave, duke pasur parasysh se asistentët me inteligjencë artificiale mund të kenë akses në mesazhet, kalendarët dhe dokumentet e përdoruesve.
Megjithatë, konkurrenca e tyre e vërtetë duhet të konfirmohet përmes testimeve të pavarura.
Vlera e aksioneve të Meta u rrit rreth katër për qind gjatë tregtimit të sotëm, raporton Reuters.
