Skandal rreth trashëgimisë së Brigitte Bardot: Publikohet letra e saj private, partneri dëbohet nga vila

Mosmarrëveshja rreth trashëgimisë së aktorës franceze të ndjerë Brigitte Bardot u përshkallëzua më tej pasi në publik u shfaq një letër e saj private, në të cilën ajo kritikon ashpër partnerin e saj afatgjatë Bernard de Clairac, me të cilin ka kaluar më shumë se 30 vjet, transmeton BBC.

Në letrën e shkruar me dorë nga nëntori i vitit 2022, Bardot e akuzon partnerin se "më shkatërron durueshëm ditë pas dite" dhe se nuk i jep dashurinë dhe mbështetjen e nevojshme.

"Sot arrita në kufirin përfundimtar të vuajtjeve të mia. Më duhet shumë një shpatull ku të mbështetem, mbështetje, butësi dhe praninë – diçka që ti nuk je në gjendje të më japësh", ka shkruar aktorja.

Publikimi i letrës e komplikuar më tej mosmarrëveshjen mes De Clairac dhe Fondacionit "Brigitte Bardot", i cili merret me mbrojtjen e kafshëve.

De Clairac, 85 vjeç, së fundmi ishte i detyruar të largohej nga vila "La Madrague" në Saint-Tropez, ku kishte jetuar me aktoren që nga fillimi i viteve '90.

Pas vdekjes së Bardot në dhjetor 2025, pasuria e saj u nda mes Fondacionit dhe djalit të vetëm Nicolas Charrière, ndërsa De Clairac nuk u përmend në testament. Aktorja kishte përcaktuar qartë se vila duhet të zbrazet brenda gjashtë muajve pas vdekjes së saj.

De Clairac e akuzoi Fondacionin se po shet shumë shpejt pasurinë e aktores. Në një ankand të mbajtur në shtator u shitën sende personale të saj për gati një milion euro.

Nga Fondacioni, nga ana tjetër, pretendojnë se ai nuk ka të drejtë ligjore mbi trashëgiminë, përveç një pjese në një apartament në Paris. Ata e akuzojnë gjithashtu se ka marrë disa sende nga vila, përfshirë një makinë, por nuk e akuzojnë për vjedhje.

"Nga ana njerëzore mund të kuptohet pse nuk dëshiron të largohet nga vila. Por kjo është ligji dhe kjo është ajo që donte Brigitte Bardot", deklaroi presidenti i Fondacionit, Max Gazani.