Banka Popullore lehtëson kushtet për disponimin e mjeteve në ALTA Banka: Nga e hëna hapen sportelet edhe në Tetovë dhe Strumicë

Banka Popullore vazhdon me lehtësimin gradual të kushteve për disponimin e mjeteve të klientëve të "ALTA Banka" AD Bitola, me qëllim që t'u mundësojë atyre qasje më të lehtë në mjetet e tyre dhe përdorim të pandërprerë të shërbimeve bankare.

Sot guvernatori i Bankës Popullore, dr. Trajko Slaveski, njoftoi publikun për tre lehtësime të reja, të cilat lidhen me zgjerimin e rrjetit për pagesa në dorë, rritjen e limiteve për përdorimin e kartave të pagesës dhe disponimin e të ardhurave nga pagat, pensionet dhe transferimet sociale.

· Nga e hëna, më 9 nëntor, do të hapen sportelet edhe në Tetovë dhe Strumicë, ku qytetarët që nuk kanë karta pagese do të mund të tërheqin deri në 20.000 denarë. Në këtë mënyrë, klientët nga këto qytete dhe zonat përreth do të mund të tërheqin mjetet pa udhëtuar deri në Bitola. Gjithashtu, Banka Popullore do t'u dalë në ndihmë qytetarëve nga qytetet përreth Bitolës, siç janë Prilepi, Reseni dhe Ohri, duke organizuar transport me autobus deri te filialet e ALTA Banka AD Bitola, me qëllim që edhe ata të mund të marrin pensionet dhe ndihmën sociale.

· Gjithashtu, nga java e ardhshme, limiti javor për tërheqjen e parasë dhe pagesat në vendet e shitjes me kartat e pagesës të Bankës rritet nga 10.000 në 15.000 denarë.

· Lehtësimi i tretë i përket të gjitha të ardhurave të reja nga pagat, pensionet dhe transferimet sociale, të cilat vijnë nga institucione ose kompani që kanë llogari në banka të tjera – qytetarët do të mund t'i tërheqin ato në tërësi, pa kufizim shume. Në këtë kuptim, klientët e Bankës nuk kanë nevojë të hapin llogari pagese në bankë tjetër, sepse do të mund të disponojnë plotësisht mbi të ardhurat e pranuara mbi këto baza, duke përdorur kartën e pagesës ose duke tërhequr para në sportelet e hapura të Bankës.

Ndryshe, pagesat për klientët deri tani zhvillohen sipas orarit të përcaktuar. Siç e dini, nga dje ka filluar pagesa e mjeteve për qytetarët që nuk kanë karta pagese. Pagesa vazhdon edhe në ditët në vijim. Filiali në Bitola punon në dy turne, dhe do të punojë edhe të shtunën, më 7 nëntor. Pagesa e mjeteve për përfituesit e ndihmës sociale filloi nga sot. Sot, në degën në Bitola u shërbyen rreth 660 klientë. Shuma mesatare e tërhequr për klient dje ishte rreth 19 mijë denarë, ndërsa sot rreth 16 mijë denarë, gjë që është e pritshme për shkak të shumave më të ulëta të transferimeve sociale.

"ALTA Banka" AD Bitola vazhdon të punojë, nuk është në falimentim dhe nuk i është hequr leja për punë. Administrimi është masë e përkohshme, e cila zbatohet deri në ndryshimin e pronësisë. Gjendja në Bankë është e mirë, ajo është likuide dhe me kapital të lartë, me cilësi solide të portofolit të kredive, njoftoi Slaveski.

"Mjetet e klientëve mbeten në llogaritë e tyre. Kufizimet e përkohshme lidhen me mënyrën e disponimit të mjeteve dhe janë vendosur për të ruajtur likuiditetin e Bankës dhe për të mbrojtur interesat e të gjithë kursimtarëve.

Banka Popullore vazhdimisht ndjek gjendjen dhe përshtat masat në përputhje me zhvillimin e saj, ku prioritet mbetet shërbimi i rregullt i qytetarëve dhe mbrojtja e interesave të klientëve të Bankës.

Banka Popullore i fton qytetarët të ndjekin informacionet e publikuara përmes kanaleve zyrtare të informimit të Bankës Popullore", shtohet në njoftimin e BP-së.