Model i ri i bursave studentore: 3.000 bursa, më shumë mundësi dhe mbështetje për studentët
Ministria e Arsimit dhe Shkencës shpall një Konkurs të ri për dhënien e 3.000 bursave studentore për vitin akademik 2026/2027, me të cilin prezantohet një përmirësim i rëndësishëm i modelit ekzistues të bursave studentore.
Modeli i ri sjell një qasje të ndryshme në shpërndarjen e mbështetjes shtetërore – një qasje që njëkohësisht njeh vulnerabilitetin social, vlerëson suksesin akademik dhe nxit arsimin e kuadrove në fusha me rëndësi strategjike për shtetin.
Në kuadër të kategorisë prej 1200 bursave për mbështetje sociale, për herë të parë prezantohen bursa të veçanta për studentë me aftësi të kufizuara dhe studentë me sëmundje të rralla, me nga 50 bursa për secilën nga këto kategori. Me këtë, Ministria bën një hap të rëndësishëm drejt një arsimi më gjithëpërfshirës dhe krijimit të mundësive të barabarta për studentët, duke njohur nevojat e tyre specifike dhe duke mbështetur të drejtën e tyre për arsim dhe zhvillim akademik, njofton MASh.
Njëkohësisht, prezantohet një kategori e re prej 1.050 bursash strategjike, të dedikuara për studentë që studiojnë në fusha me rëndësi të veçantë për zhvillimin e ardhshëm të shtetit. Zgjedhja e programeve studimore është përcaktuar me Vendimin nr. 1410-183 të datës 3 nëntor 2026 të Këshillit Kombëtar për Arsimin e Lartë dhe Veprimtarinë Shkencore-Kërkimore, me të cilin përcaktohen programet studimore me interes strategjik për shtetin. Bëhet fjalë për programet studimore në matematikë, fizikë, kimi, bujqësi, pyje, biologji mësimore dhe miniera. Qëllimi është të inkurajohen të rinjtë të zgjedhin këto fusha dhe të krijohen kuadro profesionale që do të përgjigjen nevojave të shoqërisë dhe ekonomisë.
Shtesë, prezantohen edhe 750 bursa për studentë që arrijnë sukses të lartë akademik, domethënë kanë mesatare të paktën 8,50 dhe përmbushin vazhdimisht detyrimet akademike. Në këtë mënyrë, Ministria vlerëson më tej njohuritë, përkushtimin dhe punën e studentëve që arrijnë rezultate të veçanta gjatë studimeve.
Një karakteristikë e rëndësishme e modelit të ri është se, pavarësisht prezantimit të kategorive të reja dhe shpërndarjes së ndryshme të fondeve, numri total i bursave mbetet i pandryshuar – 3.000. Ndryshimi nuk qëndron në uljen e mbështetjes, por në drejtimin më të mirë të saj dhe njohjen më të gjerë të nevojave dhe potencialeve të studentëve, informon Ministria e Arsimit dhe Shkencës.
"Për bursat strategjike shuma mujore është 18.000 denarë, ndërsa për bursat sociale dhe bursat për sukses të lartë akademik është 6.050 denarë. Bursat paguhen gjatë nëntë muajve të vitit akademik.
Regjistrimi bëhet vetëm në mënyrë elektronike, përmes portalit e-uslugi.mon.gov.mk, në periudhën nga 6 deri më 20 nëntor 2026.
Me këtë konkurs, Ministria e Arsimit dhe Shkencës vendos bazën për një sistem më modern dhe më të fokusuar të bursave studentore – një sistem që mbështet ata që kanë më shumë nevojë, njeh dhe shpërblen arritjet akademike dhe investon në njohuritë dhe kompetencat që do të jenë të rëndësishme për të ardhmen e shtetit.
Ministria e Arsimit dhe Shkencës njofton se është në proces edhe regjistrimi për Konkursin për dhënien e 15 bursave për studentë të regjistruar në vitin e parë të programeve studimore në gjuhën maqedonase për vitin akademik 2026/2027, shpallur në përputhje me Ligjin për përdorimin e gjuhës maqedonase. Më shumë informacione për këtë konkurs në lidhjen e mëposhtme, si dhe për Konkursin për kthimin e mjeteve për instrument muzikor të blerë për vitin shkollor/akademik 2026/2027.
Sepse çdo student meriton mundësinë për të përparuar, dhe shteti ka përgjegjësinë të njohë dhe mbështesë njohuritë, potencialin dhe talentin", shtohet në njoftimin e MASh.
