DPM: Qytetarët nuk jetojnë nga përqindjet – kërkojmë ekonomi që sjell paga dinjitoze, ajër të pastër dhe institucione evropiane

„Qeveria këto ditë u lavdërua me raporte pozitive nga Banka Botërore dhe rritje ekonomike prej 4.3% në tremujorin e dytë. Këto janë lajme të mira për statistikat, por mbetet pyetja kyçe: kur do ta ndiejnë qytetarët këtë rritje në portofolët e tyre, në spitalet dhe në ajrin që thithin“, thonë nga DPM.

„Demokracitë moderne evropiane prej kohësh nuk e matin suksesin vetëm përmes Prodhimit të Brendshëm Bruto (PBB). Rritja nuk ka asnjë vlerë nëse njëkohësisht rriten çmimet në markete, nëse të rinjtë thithin ajër të ndotur dhe nëse qytetarët humbin ditë në labirintet burokratike.
Prandaj, DPM nuk kërkon vetëm debat për përqindjet, por kërkon nga Qeveria futjen urgjente të Indeksit të cilësisë së jetës (Well-being Index) gjatë hartimit të buxhetit.

Lëvizjet pozitive ekonomike duhet menjëherë të përkthehen në:

• Vende pune të gjelbra dhe të sigurta, jo vetëm fuqi punëtore të lirë: Kërkojmë që subvencionet shtetërore për investimet e huaja dhe ato vendore të kushtëzohen drejtpërdrejt me nivelin e pagave që ato ofrojnë dhe ndikimin e tyre në mjedisin jetësor. Rritja duhet të mundë inflacionin!

• Eko-digitalizim, jo projekte të shtrenjta dhe shpenzuese të energjisë: Kërkojmë thjeshtim të zgjuar të shërbimeve për qytetarët, por përmes "digitalizimit të gjelbër" të qëndrueshëm. Një shtet efikas nuk bëhet me tendera miliona për qendra të mëdha të të dhënave që konsumojnë energji elektrike dhe ujë në masë, por me optimizimin e burimeve ekzistuese. Qytetari duhet të përfundojë punën shpejt, por pa krijuar shteti një barrë të re ekologjike.

• Shëndeti dhe natyra para fitimit: Kërkojmë që taksat ekologjike që paguajnë ndotësit dhe qytetarët të jenë strikt të dedikuara. Çdo denar i mbledhur nga ndotja duhet të kthehet në infrastrukturë të gjelbër, shtëpi me efikasitet energjetik dhe transport të pastër.

• Shërbime publike cilësore të aksesueshme për të gjithë: Zhvillimi ekonomik duhet të nënkuptojë shkolla të rinovuara dhe klinika të pajisura, jo vetëm rrugë të reja të asfaltuara para zgjedhjeve.

Banka Botërore thotë se na duhen reforma strukturore. DPM thotë se ato reforma duhet të kenë fytyrë njerëzore. Qytetarët e Maqedonisë nuk duan vetëm të dëgjojnë se ekonomia po rritet – ata duan të jetojnë në një shtet ku kjo rritje u mundëson standard jetese evropian, siguri ekonomike dhe mjedis të shëndetshëm“, thuhet në njoftimin e DPM.