Bullgaria insiston në garantimin e të drejtave të bullgarëve; Petrova kategorike, nuk do të marrin pjesë në negociata të reja për detyrimet e Maqedonisë
Bullgaria në mënyrë kategorike nuk merr pjesë në asnjë konsultim për negociimin e detyrimeve të marra nga Republika e Maqedonisë së Veriut (RMV) në rrugën e saj drejt Bashkimit Evropian. Këtë e deklaroi ministrja e Punëve të Jashtme Velislava Petrova gjatë kontrollit parlamentar të sotëm në Kuvendin Popullor, raportuan mediat bullgare.
Deklarata e ministres së Punëve të Jashtme, sipas shkrimit, vjen si përgjigje ndaj pyetjeve të deputetëve lidhur me gjendjen aktuale të marrëdhënieve bilaterale dhe integrimit evropian me fqinjët perëndimorë.
Ministrja Petrova, shkruan Bgnes, mohoi se Bullgaria është në proces diskutimi ose konsultimi për ndryshimin e kushteve dhe detyrimeve tashmë të përcaktuara të marra nga Shkupi. Qëndrimi i Sofjes mbetet i pandryshuar – zbatimi i marrëveshjes në vitin 2022 është rruga më direkte dhe e vetme e mundshme për Republikën e Maqedonisë së Veriut për të avancuar drejt anëtarësimit në BE.
Bullgaria nuk vendos kërkesa të reja jashtë kornizës së pranuar evropiane, por insiston në respektimin strikt të marrëveshjeve të nënshkruara deri tani dhe garantimin e të drejtave të bullgarëve në vendin fqinj, tha Petrova.
Në kuadër të kontrollit parlamentar, ministrja e Punëve të Jashtme mbrojti qëndrueshmërinë e politikës së jashtme bullgare, duke theksuar se ndërtimi i fqinjësisë së qëndrueshme dhe besimit mund të ndodhë vetëm përmes veprimeve reale dhe zbatimit të detyrimeve të marra nga Shkupi.
