Kryeministri polak i bëri thirrje „Perëndimit të tërë“ të përballet më vendosmërisht me Rusinë

Kryeministri polak Donald Tusk i bëri thirrje „Perëndimit të tërë“ të marrë një qëndrim më vendimtar ndaj Rusisë dhe presidentit Vladimir Putin, i cili, siç tha, lufton për dominim.

„Tani është momenti që Perëndimi i tërë – Evropa dhe SHBA-të – t’i tregojnë Rusisë dhe Putinit vendosmërinë në vazhdimin e politikës së mbajtjes së Rusisë nën kontroll përmes masave edhe më të forta“, deklaroi Tusk në Forumin e Sigurisë në Varshavë, duke folur për politikën e sanksioneve.

„Nëse Ukraina lufton, ajo lufton për mbijetesë, ndërsa Rusia lufton për dominim“, shtoi ai. „Prandaj do të udhëtoj në Bruksel për t’i thirrur të gjithë partnerët tanë evropianë që seriozisht të mendojnë për ashpërsimin e sanksioneve ndaj Rusisë“, tha ai para samitit të planifikuar për më vonë këtë javë.

Polonia, një vend anëtar i NATO-s dhe Bashkimit Evropian që kufizohet me Rusinë, është një aleat i ngushtë i Ukrainës që nga fillimi i pushtimit të plotë rus në vitin 2022, duke siguruar ndihmë kyçe ushtarake dhe humanitare.

Tusk dërgon mesazh për Perëndimin
Polonia vazhdimisht e akuzon Rusinë për sabotim dhe luftë hibride në territorin polak – akuza që Moska i ka mohuar. Në shtator, Donald Tusk paralajmëroi se planet ruse lidhur me luftën në Ukrainë përfshijnë sulme „hibride“ me dronë dhe raketa ndaj aleatëve të Kievit, përfshirë edhe Varshavën.

Kryeministri polak, politikan nga qendra dhe mbështetës i integrimit evropian, përsërit me këmbëngulje se Polonia do të mbetet një aleat i fortë i Ukrainës dhe i bën thirrje vendeve të tjera perëndimore të tregojnë solidaritet.

Deklarata e tij të hënën erdhi pasi presidenti amerikan Donald Trump njoftoi një armëpushim energjetik midis dy vendeve në luftë, pa dhënë detaje për marrëveshjen, gjë që shkaktoi shqetësim në Kiev deri sa Moska nuk doli me një deklaratë.

„Ne në Poloni e kujtojmë shumë mirë se si propaganda naziste përpiqej t’i bindte Evropën dhe botën se Polonia ishte përgjegjëse për agresionin gjerman“, tha Tusk.

Në të njëjtën kohë, ai paralajmëroi se „të njëjtat pretendime dëgjohen sot në Moskë, dhe fatkeqësisht, gjithnjë e më shpesh edhe në disa nga kryeqytetet tona kryesore“.