Kryetari i "Microsoft": Inteligjenca artificiale është më pak e rregulluar se qumështi; na duhen zgjidhje urgjente
Kryetari i "Microsoft", Brad Smith, paralajmëroi se produktet si qumështi dhe makinat e larjes aktualisht i nënshtrohen rregulloreve më të rrepta sesa inteligjenca artificiale. Si pasojë, ai mbështet vendosjen e rregullave globale të sigurisë për inteligjencën artificiale (IA), transmeton BBC.
Qëndrimet e Smith janë në kundërshtim me politikën e presidentit Donald Trump, i cili mendon se sektori duhet të vetë-rregullohet që kompanitë amerikane të mos mbeten pas konkurrentëve kinezë. Megjithatë, Smith është i prerë: "Aktualisht, ka rregulla më të rrepta sigurie për makinën tuaj të larjes sesa për inteligjencën artificiale. Çdo paketim qumështi që shihni në dyqan kalon nëpër kontrolle dhe inspektime sigurie".
Thirrjet për ligje që do të kontrollonin inteligjencën artificiale u bënë më të forta pasi ekspertë të industrisë paralajmëruan se kjo teknologji përbën kërcënim për njerëzimin. Liderët e kompanive teknologjike si Anthropic, OpenAI dhe Google DeepMind mbështetën idenë e ngadalësimit të zhvillimit të IA – një lëvizje ndaj së cilës Trump është kundër.
Nevoja urgjente për rregulla
Në një intervistë për BBC, Smith përshkroi inteligjencën artificiale si "një mjet" dhe si "një armë" dhe theksoi nevojën urgjente për rregullim. "Le të fillojmë me këtë që sot", tha ai. Ai mendon se kompanitë duhet të kenë "frena sigurie" – në industri të njohura si "çelësa emergjentë" (kill switches) – që do t’u mundësonin të ndalonin ose ngadalësonin IA-në nëse ajo del jashtë kontrollit.
Ai gjithashtu propozon që kompanitë ligjërisht të detyrohen të përgatisin "raporte incidentesh" dhe të njoftojnë viktimat nëse teknologjia bëhet e paparashikueshme. Sipas tij, ekspertë të pavarur qeveritarë duhet të kontrollojnë teknologjinë e re të IA-së para se ajo të lirohet për publikun. "E dimë si bëhet kjo me produkte të tjera", tha Smith. "Duhet të përdorim këtë njohuri dhe të mendojmë se si ta zbatojmë atë në IA".
Smith mendon se Mbretëria e Bashkuar është në pozicionin më të mirë për të udhëhequr procesin e vendosjes së rregullave globale, falë Institutit të Sigurisë së IA-së, themeluar gjatë qeverisjes së ish-kryeministrit Rishi Sunak. "Në botën e teknologjisë, shumica e njerëzve që njoh do të pajtoheshin se Mbretëria e Bashkuar është lider në aftësitë teknike. Ata thjesht janë më të mirët".
Edhe pse Trump mbështet zhvillimin e shpejtë me moton "kush fiton në IA, fiton gjithçka", Smith nuk mendon se qeveria amerikane domosdoshmërisht do të kundërshtonte rregullore të udhëhequra nga Mbretëria e Bashkuar. Ai mendon se SHBA do të pranonte më lehtë standardet e vendosura nga Mbretëria e Bashkuar sesa ato të Bashkimit Evropian. "Në Uashington nuk e shohin Londrën në të njëjtën mënyrë si Brukselin – dhe kjo është një avantazh", tha ai.
A nuk është e mjaftueshme vetë-rregullimi?
"Kur shikon agjentë me inteligjencë artificiale që janë jashtë kontrollit njerëzor ose modele kaq të fuqishme sa kërcënojnë sigurinë kibernetike globale, do të thoja se ai moment ka ardhur tashmë. Le të flasim qetë, ndoshta në heshtje, por me vendosmëri, dhe të fillojmë të bashkojmë njerëzit. Shpresoj që ne si kompani, por edhe Mbretëria e Bashkuar si vend, të mund të luajmë atë rol", shtoi ai.
Në fund të muajit të kaluar, Trump në Shtëpinë e Bardhë priti liderët e kompanive OpenAI, Anthropic, Nvidia, SpaceX, Meta dhe Google. Në atë rast, ata nënshkruan një dokument që e përshkruan si "moralisht detyrues". Kompanitë ranë dakord të bashkëpunojnë me "auditorë të pavarur" për të vlerësuar nëse sistemet e tyre të inteligjencës artificiale funksionojnë siç është parashikuar dhe për të siguruar që ato nuk pengojnë sisteme të tjera teknike në mënyra të paparashikueshme.
Smith thotë se përshëndet iniciativën dhe se Microsoft do ta nënshkruajë me kënaqësi. "Është një hap i mirë dhe i nevojshëm, por mendoj se nuk është më i mjaftueshëm." Ai shpjegoi se sfida kryesore në çdo sistem vetë-rregullimi është se "kompanitë e mira do të bëjnë atë që kërkohet prej tyre", ndërsa problemi qëndron tek kompanitë që nuk janë aq përgjegjëse.
