Melania Trump priti përfaqësuesit e Rusisë dhe Ukrainës në Shtëpinë e Bardhë
Përfaqësues rusë dhe ukrainas u shfaqën së bashku në Shtëpinë e Bardhë, me ftesë të zonjës së parë Melania Trump, pas armëpushimit të përkohshëm në Ukrainë, të cilin ajo ndihmoi të arrihej.
Kjo mbledhje e pazakontë u mbajt pas armëpushimit gjashtëditor në qytetin Oleshki, i pushtuar nga Rusia, dhe rrethinave të tij në rajonin Kherson në Ukrainë.
Ndërprerja e zjarrit, që zgjati nga 27 tetori deri më 1 nëntor, i lejoi banorët të evakuoheshin në territor nën kontroll ukrainas ose rus ose të qëndronin në Oleshki, me furnizime të rinovuara ushqimore dhe materiale mjekësore.
Melania Trump deklaroi se më shumë se 750 persona u evakuan gjatë operacionit humanitar. Autoritetet ukrainase nuk kanë publikuar numrin e tyre të evakuar.
Ndërprerja e zjarrit ishte e kufizuar në Oleshki dhe operacionin humanitar në afërsi të tij, ndërsa luftimet vazhduan në pjesë të tjera të Ukrainës, duke përfshirë sulmet me dronë rusë dhe ukrainas.
Melania Trump u tha të pranishmëve se kishte ndërmjetësuar mes dy vendeve për organizimin e një armëpushimi humanitar.
Armëpushimi gjashtëditor ishte armëpushimi më i rëndësishëm që nga kur presidenti rus Vladimir Putin nisi pushtimin e plotë të Ukrainës më 24 shkurt 2022.
"Zgjedhëm njerëzillëkun para luftës. Duhet të shfrytëzojmë guximin që treguam në Oleshki për të gjetur një gjuhë të përbashkët përmes kujdesit të përbashkët ndaj vuajtjeve të njerëzve të pafajshëm", tha Melania Trump.
Ukrainën e përfaqësonte David Arakhamia, i cili udhëheq grupin parlamentar "Shërbëtorët e Popullit" të presidentit ukrainas Volodymyr Zelensky në parlamentin ukrainas.
Avokati ukrainas për të drejtat e njeriut Dmytro Lubinets ishte pjesë e delegacionit.
Takimi u mbajt disa ditë pasi Zelensky i dha Melania Trump Urdhrin e Princeshës Olga të shkallës së parë, niveli më i lartë i këtij nderimi në Ukrainë, duke përmendur mbështetjen e saj humanitare për atë vend si arsye.
Rusin e përfaqësuan Kirill Dmitriev, i dërguari special i Putinit, dhe Yana Lantratova, komisionerja ruse për të drejtat e njeriut.
Dmitriev i falënderoi zonjën e parë për "rolin e saj të jashtëzakonshëm humanitar" në arritjen e armëpushimit dhe tha se Putin kishte dhënë udhëzime personale në kuadër të operacionit dhe i kishte shprehur falënderimet Melania Trump.
Presidenti Donald Trump nuk ishte i pranishëm në ngjarje.
Shfaqja ofroi një pamje të rrallë të përfaqësuesve të lartë të Ukrainës dhe Rusisë së bashku në Shtëpinë e Bardhë, ndërsa lufta po afrohet drejt përvjetorit të pestë.
Melania Trump i bëri thirrje të dy vendeve që të zgjeronin marrëveshjen e Oleshkit dhe të synonin arritjen e diçkaje më të qëndrueshme sesa armëpushimi gjashtëditor. Ajo tha se u kishte shkruar letra Putinit dhe Zelenskyt dhe kërkoi nga përfaqësuesit e qeverive të tyre t’i dorëzonin. Ajo nuk zbuloi përmbajtjen e tyre.
Takimi u mbajt disa ditë para se zyrtarët e Shteteve të Bashkuara, Ukrainës dhe Rusisë të zhvillonin bisedime trilaterale më 10 dhe 11 nëntor në Abu Dabi, kryeqytetin e Emirateve të Bashkuara Arabe.
Foto: EPA
