Netanyahu: Urime për mikun tim të madh Milorad Dodik
Kryeministri izraelit, Benjamin Netanyahu, i uroi Milorad Dodik dhe Aleancës së tij të Socialdemokratëve të Pavarur (SNSD) për fitoren në zgjedhjet e përgjithshme të mbajtura të dielën në Bosnje dhe Hercegovinë. Ai i përshkroi Dodikun dhe kolegët e tij partiakë si miq të mëdhenj dhe paralajmëroi forcimin e mëtejshëm të bashkëpunimit me Republikën Srpska.
"Dua t'u uroj miqve të mi të mëdhenj – presidentit Milorad Dodik, presidentes Željka Cvijanović, presidentit Savo Minić dhe SNSD-së – për fitoren e tyre bindëse në zgjedhjet në Republikën Srpska këtë javë", shkroi Netanyahu në rrjetin social X.
"Me padurim pres vite bashkëpunimi të ngushtë dhe zgjerim e thellim të bashkëpunimit midis popujve tanë në fushat e teknologjisë, energjisë, sigurisë dhe fusha të tjera", shtoi kryeministri izraelit.
Në zgjedhjet e përgjithshme të mbajtura më 4 tetor, SNSD arriti një sukses të rëndësishëm në Republikën Srpska, sipas rezultateve paraprake të Komisionit Qendror Zgjedhor (CIK) të BiH. Željka Cvijanović, kandidate e SNSD-së për anëtare serbe të Presidencës së trefishtë të BiH, fitoi mandatin e dytë, ndërsa Savo Minić – kandidati i së njëjtës parti për president të Republikës Srpska – ishte në epërsi ndaj kandidatit opozitar të SDS-së, Branko Blanuša, sipas rezultateve paraprake.
Dodik, i cili më parë humbi funksionin e presidentit të Republikës Srpska, mbeti në krye të SNSD-së dhe shpalli fitoren e partisë së tij pas zgjedhjeve.
Në vitet e fundit, Dodik ka mbajtur lidhje të ngushta me udhëheqjen politike të Izraelit. Ai ka vizituar disa herë Izraelin, ku është takuar me Netanyahu-n dhe presidentin izraelit Isaac Herzog. Autoritetet e Republikës Srpska synojnë të zgjerojnë bashkëpunimin me Izraelin, veçanërisht në fushat e teknologjisë, ekonomisë, bujqësisë dhe sigurisë.
