Sulmuesi pranë Parisit qëlloi edhe në një fushë loje për fëmijë, Macron e quajti sulmin terrorizëm racist

Në të shtënat në Trappes dhe La Verrière u vra një burrë, ndërsa pesë persona u plagosën. I dyshuari qëlloi nga një makinë në tre vende, ndërsa policia e arrestoi në afërsi të Coignières.

Prokuroria Kombëtare Antiterroriste franceze po kryen hetime për një motiv të mundshëm terrorist dhe racist.

Në mesin e të plagosurve është edhe një vajzë 12-vjeçare

Të shtënat ndodhën këtë mëngjes. Sipas ministrit të Brendshëm, Laurent Nuñez, i dyshuari qëlloi në tre vende në Trappes dhe La Verrière. Sulmi zgjati më pak se 15 minuta.

Ministri deklaroi se i dyshuari përdori një armë që dukej si armë ushtarake ose, së paku, armë automatike.

Në mesin e të plagosurve është edhe një vajzë 12-vjeçare. BFM TV raportoi se ajo u godit tetë herë, ndërsa kryetari i komunës së La Verrière më vonë deklaroi se gjendja e saj u stabilizua.

Kryetari i komunës së Trappes, Ali Rabeh, deklaroi se burri i vrarë ishte me prejardhje afrikane, ndërsa një nga të plagosurit me prejardhje nga Afrika e Veriut.

U arrestua edhe një anëtar i familjes së të dyshuarit

Policia e arrestoi të dyshuarin në afërsi të Coignières. Prokuroria Antiterroriste e identifikoi atë si Kevin T., 39 vjeç, i lindur në vitin 1987.

Në paraburgim është mbajtur edhe një anëtar i ngushtë i familjes së tij.

Prokuroria njoftoi se i dyshuari kishte vendosur në banesën e tij tre bombola gazi të lidhura me tela dhe një timer.

Hetuesit ende nuk e kanë marrë në pyetje pasi prania e tij ishte e nevojshme gjatë kontrollit të banesës.

Presidenti francez Emmanuel Macron e quajti sulmin një sulm terrorist racist. Ai deklaroi se viktimat u përzgjodhën për shkak të ngjyrës së lëkurës ose përkatësisë fetare që sulmuesi u atribuonte atyre.

Kryetari i komunës Ali Rabeh deklaroi se sulmi me shumë gjasa ishte i motivuar nga islamofobia.