Trump: Kam të drejtë të kandidoj përsëri për president sepse më mashtruan
Presidenti amerikan Donald Trump deklaroi se mendon se ka të drejtë të kandidojë përsëri për president të SHBA-së, sepse, siç pretendon, demokratët i vodhën fitoren në zgjedhjet e vitit 2020.
Në një tubim parazgjedhor të mbajtur dje në Sioux City, në shtetin federal Iowa, Trump pranoi se Kushtetuta amerikane i ndalon një mandat të tretë presidencial, por përsëri pretendoi se fitoi në të tre zgjedhjet presidenciale në të cilat mori pjesë.
"Nuk e di se kush do të jetë presidenti juaj i ardhshëm, dhe mendoj se ligji thotë se nuk duhet të kandidoj përsëri. Kam studiuar gjatë atë formulim", u tha Trump mbështetësve të tij.
Më pas u rikthye përsëri te zgjedhjet e vitit 2020, në të cilat humbi nga kandidati demokrat Joe Biden.
"Por një gjë është ndryshe. Na mashtruan në zgjedhjet e dyta. Dhe ne fituam tre herë. Mendoj se kam të drejtë të kandidoj përsëri sepse më mashtruan", deklaroi Trump.
Trump fitoi në zgjedhjet presidenciale të vitit 2016 dhe 2024. Pretendimet e tij se fitoi edhe në vitin 2020 nuk mbështeten me prova, dhe përpjekjet për të sfiduar rezultatet nuk e ndryshuan rezultatin zyrtar.
Presidenti amerikan më parë ka përmendur disa herë mundësinë e një mandati të tretë, edhe pse në tetor 2025 pranoi se ndalimi kushtetues është i qartë.
Sipas Amendamentit të 22-të të Kushtetutës së SHBA-së, asnjë person nuk mund të zgjidhet president më shumë se dy herë. Kjo dispozitë u ratifikua në vitin 1951, dhe ndryshimi i saj do të kërkonte mbështetje me dy të tretat në të dyja dhomat e Kongresit dhe ratifikim nga tre të katërtat e shteteve federale.
Deklaratat e Trump vijnë para zgjedhjeve kongresuale më 3 nëntor, ku republikanët përpiqen të ruajnë shumicën në Kongres. Trump në Iowa mbajti një tubim për mbështetjen e kandidatëve republikanë, përfshirë Ashley Hinson, kandidate për Senatin.
