(Video) Për shkak të surprizës së Trump për Natën e Shtrigave, vonuan më shumë se 200 fluturime në Uashington
Fluturimi i avionit presidencial mbi Shtëpinë e Bardhë, i organizuar si një surprizë për fëmijët në festën e Natës së Shtrigave, shkaktoi vonesa në dhjetëra fluturime dhe shqetësim tek banorët e Uashingtonit, raporton Reuters.
Avioni, i cili mban shenjën "Air Force One" kur në të udhëton presidenti amerikan Donald Trump, mbrëmë kaloi dy herë në fluturim të ulët mbi Shtëpinë e Bardhë dhe lagjet përreth. Për shkak të kësaj, Administrata Federale e Aviacionit (FAA) ndaloi përkohësisht trafikun në aeroportin afër "Ronald Reagan".
Në momentin e fluturimit, Trump ishte nikoqir i një feste për fëmijë në lidhje me Natën e Shtrigave. Shtëpia e Bardhë publikoi një video nga ngjarja, duke e përshkruar atë si një "fluturim epik" të organizuar për fëmijët që erdhën për ëmbëlsira.
Autoritetet e qytetit njoftuan se ishin informuar për fluturimin vetëm 15 minuta më parë, për këtë arsye shumë njerëz u frikësuan. Kompanitë ajrore, nga ana tjetër, u njoftuan më pak se një orë para ngjarjes.
Sipas të dhënave të "FlightAware", në aeroport dje vonuan gjithsej 202 fluturime, që përbënin 26 për qind të fluturimeve nisëse dhe 17 për qind të atyre mbërritëse. Pjesa më e madhe e vonesave lidhej me ndalimin e përkohshëm të trafikut ajror.
