Gjorxhevski në "Korçagin": Uniforma falas për të gjithë nxënësit e vitit të parë
Kryetari i Qytetit të Shkupit, Orce Gjorxhevski, sot në shkollën e mesme "Rade Jovçevski – Korçagin" promovoi uniformat falas për të gjithë nxënësit e vitit të parë.
– Premtuam dhe po e realizojmë. Ka mbërritur dërgesa e parë e uniformave falas, të cilat janë bërë nga 100% pambuk. Kjo është fillimi i zbatimit të masës me të cilën uniforma do të marrin të gjithë nxënësit e vitit të parë në shkollat e mesme të Qytetit të Shkupit. Për mua, çdo fëmijë meriton të hyjë në klasë me kokën lart. Të ndihet i pranuar, i respektuar dhe i barabartë. Asnjë nxënës nuk duhet të ndihet më pak i vlefshëm për shkak të mundësive financiare të familjes së tij. Në bankat shkollore duhet të vlerësohen njohuritë, përpjekja dhe talenti. Atje ndërtohen miqësi, zbulohen aftësi dhe lindin ëndrra të mëdha. Detyra jonë është të krijojmë kushte që ato ëndrra të rriten. Pikërisht për këtë, me uniformat falas lehtësojmë barrën mbi buxhetin familjar dhe kontribuojmë në uljen e dallimeve sociale të dukshme midis nxënësve. Po bëjmë një hap konkret drejt një ambienti shkollor ku nuk ka vend për tallje, diskriminim dhe ngacmime për shkak të veshjes që dikush mban – deklaroi Gjorxhevski.
Kryetari Gjorxhevski theksoi se kjo masë është pjesë e shumë aktiviteteve të qytetit në interes të të rinjve.
– Kemi pajisur kabinete të informatikës, kemi siguruar materiale dhe ndihma didaktike, teknologji interaktive, tabela smart, banka dhe karrige të reja. Investojmë në fusha sportive dhe zona fitnesi, në kushte moderne për mësim dhe zhvillim të shëndetshëm. Vazhdoj me të njëjtën vendosmëri, sepse pas çdo mase qëndrojnë nxënës me shpresa të tyre dhe familje që presin mbështetje. Besimi i tyre është një detyrë që plotësohet me vepra. Investimi tek të rinjtë është investim në të ardhmen. Dhe të ardhmen e Shkupit e ndërtojmë sot, me çdo premtim të përmbushur – tha Gjorxhevski.
