Klekovski: Nga vlerësimi drejt një plani kombëtar për cilësi me përgjegjësi të qarta, rezultate të matshme dhe afate reale
Me mbështetjen e Organizatës Botërore të Shëndetësisë dhe në bashkëpunim me Agjencinë për cilësi dhe akreditim të institucioneve shëndetësore (AKAZUM), sot u mbajt punëtoria e dytë kombëtare e dedikuar forcimit të kuadrit kombëtar për cilësinë e kujdesit shëndetësor. Në punëtori foli ministri i Shëndetësisë, Sašo Klekovski.
Në punëtori u prezantuan rezultatet e vlerësimit kombëtar të cilësisë së kujdesit shëndetësor. Vlerësimi u realizua gjatë muajve të kaluar me mbështetje profesionale nga Zyra e OBSH-së në Shkup dhe Zyra e OBSH-së për cilësinë e kujdesit shëndetësor dhe sigurinë e pacientëve në Athinë, duke përdorur mjetin e OBSH-së për vlerësimin kombëtar të cilësisë. Ai përfshiu shqyrtimin e dokumenteve, konsultime me institucionet, punonjësit shëndetësorë dhe përfaqësuesit e pacientëve, si dhe vizita në terren në klinika, spitale dhe institucione të kujdesit parësor shëndetësor.
Vlerësimi tregon se shteti ka baza të rëndësishme për cilësinë: kuadër ligjor, Strategjinë për shëndetësi 2021–2030, Planin kombëtar për sigurinë e pacientëve, mekanizma për akreditim dhe sisteme digjitale si "Termini Im". Sfida kryesore është që këto elemente të lidhen në një sistem kombëtar funksional me përgjegjësi të qarta, burime të përshtatshme dhe monitorim të rregullt të përparimit.
"Kemi ligje, strategji dhe sisteme, por ato ende nuk funksionojnë si një sistem i vetëm. Sfida jonë nuk është të sjellim dokumente të reja, por që ato ekzistuese të funksionojnë realisht në praktikë", deklaroi ministri Klekovski.
Ministri theksoi tre prioritete: sigurinë e pacientëve dhe tejkalimin e kulturës së pandëshkueshmërisë, lidhjen e financimit të shërbimeve shëndetësore me cilësinë dhe përcaktimin e qartë të përgjegjësive të çdo institucioni.
"Gabimi që nuk raportohet është gabim që do të përsëritet. Na duhet një sistem ku raportimi është i mbrojtur dhe nga i cili mësojmë, dhe punonjësi shëndetësor që ka raportuar merr mbështetje, jo pasoja", theksoi Klekovski.
Hapi tjetër është përgatitja e një plani kombëtar për cilësinë e kujdesit shëndetësor. Ministria do të ketë rol udhëheqës në këtë proces, dhe Plani do të përmbajë një numër të kufizuar prioritetesh, institucione përgjegjëse, burime të nevojshme, afate dhe tregues për monitorimin e përparimit.
"Nuk na duhet një dokument tjetër që do të mbetet vetëm në letër. Për çdo prioritet do të dimë kush është përgjegjës, deri kur dhe si do ta masim përparimin", theksoi ministri.
Paralelisht, Ministria punon për përmirësimin e kuadrit ligjor për cilësinë, me qëllim vendosjen e standardeve dhe mekanizmave për menaxhimin e cilësisë dhe monitorimin e rezultateve.
