ZNAM për AA dhe LSDM: Patriotizmi provohet me vepra, Dimitrievski nuk la pozicion rezervë në Kuvend
Lëvizja ZNAM i hedh poshtë diskualifikimet personale dhe konstruksionet politike të Aleancës për Shqiptarët dhe LSDM-së drejtuar ndaj kryetarit të partisë, Maksim Dimitrievski. Nga ZNAM vlerësojnë se kur nuk ka argumente për thelbin e çështjeve, mbeten fyerjet dhe përpjekjet për diskreditim politik.
"Kualifikimi ‘patriot me bateri’ flet më së miri për kulturën politike të atyre që e përdorin, por jo për Maksim Dimitrievskin", thuhet në njoftimin partiak.
Nga ZNAM kujtojnë se në vitin 2017, para zgjedhjeve lokale, Dimitrievski u tërhoq nga mandati i deputetit dhe pa kalkulime politike hyri në betejën zgjedhore për kryetar të komunës së Kumanovës, pa lënë pozicion rezervë në Kuvend nëse do të humbte zgjedhjet.
"Në kundërshtim me këtë, disa nga drejtuesit e atëhershëm të LSDM-së, kandidatë për kryetarë komunash, mbajtën mandatet e deputetit si alternativë të sigurt. Pikërisht këtu qëndron ndryshimi në qasjen politike dhe përgjegjësinë. Patriotizmi nuk matet me fyerje, por me vendime, veprime dhe përgjegjësi të marrë", theksojnë nga partia.
Lidhur me provimin gjyqësor, nga ZNAM përsërisin se qëndrimi i tyre është që ai të mbahet në gjuhën maqedonase, në përputhje me Kushtetutën dhe ligjet. Gjuha maqedonase, thonë ata, nuk është subjekt i tregtisë politike dhe kalkulimeve koalicionare. Ata theksojnë se janë të gatshëm për biseda me partnerët qeveritarë, por nuk do të heqin dorë nga parimet e tyre.
I njëjti parim, siç theksojnë, mbrohet edhe në lidhje me eurointegrimet. Maqedonia dëshiron anëtarësim në Bashkimin Evropian, por nuk pranon dhurata të njëanshme të vazhdueshme ndaj Bullgarisë pa reciprocitet. Nga ZNAM thonë se propozimi i tyre për veprim të shtyrë të ndryshimeve kushtetuese mbetet në tavolinë.
Atje presin respektimin e të drejtave të maqedonasve në Bullgari dhe zbatimin e vendimeve të Gjykatës Evropiane për të Drejtat e Njeriut në Strasburg.
Duke iu referuar akuzave të LSDM-së për takime të dyshuara, lobime dhe lidhje me Alta Bankën, nga ZNAM kërkojnë të bëhen publike prova konkrete, fakte dhe dokumente.
"Nëse ekzistojnë prova për veprime të paligjshme, institucionet kompetente duhet të veprojnë. Akuzat serioze nuk duhet të jenë mjet për llogari ditore politike", theksojnë nga partia.
Nga ZNAM nënvizojnë se çështjen e gjuhës maqedonase nuk e hapin për t'i siguruar alibi kujtdo, por sepse e konsiderojnë çështje me rëndësi thelbësore për shtetin.
Lidhur me akuzat për rënie të supozuar të mbështetjes, nga partia kujtojnë se në zgjedhjet e vitit 2024 morën 56,232 vota, ose 5.59 për qind dhe gjashtë mandate deputetësh, edhe pse, siç thonë, disa analistë parashikonin mbështetje rreth një për qind.
"Këto janë rezultate zyrtare zgjedhore, jo vlerësime të dikujt", theksojnë nga ZNAM, duke shtuar se sipas anketës së tyre të brendshme, mbështetja aktuale për partinë është mbi 4.5 për qind, që do të korrespondonte me rreth 50,000 deri në 55,000 vota nëse zgjedhjet do të mbaheshin sot.
Nga partia përcjellin mesazhin se nuk do të ndryshojnë parimet sipas nevojave ditore politike, as nuk do të tregtojnë me gjuhën maqedonase dhe nuk do të pranojnë dhurata të njëanshme pa reciprocitet.
"Maqedonia nuk është subjekt i tregtisë politike. Ajo është përgjegjësia dhe detyra jonë. Patriotizmi provohet me vepra, me qëndrim dhe me gatishmërinë për të marrë përgjegjësi për interesat shtetërore", thuhet në njoftim.
