Ekspert për inteligjencën artificiale paralajmëron: Nevojitet mbikëqyrje më e rreptë, përndryshe na presin probleme më të mëdha
Sulmet e fundit hakerore të kryera me ndihmën e agjentëve me inteligjencë artificiale shërbejnë si një "paralajmërim i hershëm" për atë që po vjen, mendon Demis Hasabis, drejtor ekzekutiv i "Google DeepMind".
Hasabis deklaroi se këto sulme mund të jenë një sinjal paralajmërues që, nëse nuk përmirësohet siguria e sistemeve, bota në vitet e ardhshme mund të përballet me incidente edhe më serioze.
Duke folur në një samit për inteligjencën artificiale në Dublin, ai propozoi që në këtë fushë të futen praktika sigurie të ngjashme me ato që zbatohen në sektorë si biologjia dhe energjia bërthamore.
Sipas tij, është e nevojshme të krijohet një organ ndërkombëtar që do të zhvillojë standarde sigurie dhe një sistem certifikimi për inteligjencën artificiale, ku kërkesat do të përshtateshin me nivelet konkrete të rrezikut – dhe do të ishin mjaft fleksibël për të ndjekur zhvillimin teknologjik.
Sjellja e papërshtatshme e agjentëve me inteligjencë artificiale – përfshirë edhe sulmet në rrjetet korporative, si dhe incidenti i fundit ku një model i kompanisë "Anthropic" dërgoi një raport të rremë për vrasje në polici – kanë rritur shqetësimet lidhur me përparimin e shpejtë të kësaj teknologjie.
Kryetari i "Microsoft", Brad Smith, e përshkroi situatën aktuale si një realitet që na thërret për reflektim serioz mbi sjelljen e paparashikueshme të inteligjencës artificiale. Ai bëri thirrje për miratimin urgjent të ligjeve dhe rregulloreve të reja, me qëllim që standardet e sigurisë të ecin në hap me inovacionet teknologjike.
"Asnjë kompani apo teknologji nuk duhet të jetë mbi ligjin. Na duhen ligje dhe rregulla, por ato duhet të jenë të arsyeshme, të balancuara dhe të marrin parasysh inovacionet", tha Smith.
