Bullgaria i fton Rusinë dhe Ukrainën në të njëjtën tryezë lidhur me Detin e Zi

Bullgaria propozoi negociata midis gjashtë vendeve që kufizohen me Detin e Zi me qëllim arritjen e një marrëveshjeje për moratorium mbi armiqësitë dhe për ta kthyer atë rrugë ujore në një "zonë të përbashkët sigurie".

Vendi propozoi bisedime me Rusinë, Ukrainën, Bullgarinë, Rumaninë, Gjeorgjinë dhe Turqinë pas takimit pesëorësh të Këshillit Konsultativ për Sigurinë Kombëtare (KSK) të Bullgarisë, njoftoi portali bullgar "EUalive".

Propozimi parashikon që Sofja të ndihmojë në ndërmjetësimin për një marrëveshje që do të përfshinte Rusinë, pasi Deti i Zi është bërë një mjedis me "rreziqe sigurie" gjithnjë e më të theksuara.

Presidentja e Bullgarisë, Iliana Jotova, vlerësoi se vendi i saj duhet të marrë një rol aktiv në zgjidhjen e problemeve dhe arritjen e konsensusit midis vendeve që kufizohen me Detin e Zi.

"Çështja e Detit të Zi, rreziqet, kërcënimet dhe zgjidhjet e sigurisë duhet të prezantohen në të gjitha format evropiane në të cilat merr pjesë Bullgaria, dhe më e rëndësishmja në samitin e ardhshëm të BE-së më 16 tetor", tha ajo.

Takimi i KSK u thirr pasi të martën filloi një operacion i madh shpëtimi pas sulmeve të koordinuara nga mjete detare dhe ajrore pa pilot që goditën dy anije tregtare rreth 70 milje detare nga Bjala, në lindje të Kepit Shën Atanas.

Kjo u përshkrua si sulmi i parë ndaj anijeve në zonën ekskluzive ekonomike të Bullgarisë, por nuk u përcaktua se cilat mjete pa pilot ishin ato.

Kryeministri Rumen Radev insiston se Bullgaria nuk mund ta akuzojë Rusinë pa prova.
"Nuk mund të pretendojmë se grushti i shtetit u krye nga Rusia pa prova. Kjo është një hipotezë, dhe kur flasim për sigurinë kombëtare, nuk mund të punojmë me hipoteza", tha ai gjatë takimit, sipas Tanjug.