Kalas: Amerika po detyron Ukrainën të dorëzohet
Kryetarja për politikë të jashtme e BE-së, Kaja Kalas, akuzoi SHBA-në se po ushtrojnë presion mbi Ukrainën që të dorëzohet sipas kushteve të presidentit rus Vladimir Putin, njoftoi “Euronews”.
“Negociatorët amerikanë po përpiqen ta detyrojnë Ukrainën të dorëzohet për gati dy vjet, më saktë një vit e gjysmë”, deklaroi Kalas para Parlamentit Evropian.
“Ukraina nuk u dorëzua sipas kushteve të Putinit vetëm sepse Europa e mbështeti.”
Kalas shtoi se praninë e Evropës në tryezën e negociatave e konsideron të domosdoshme për të balancuar pozicionet e Shtëpisë së Bardhë, të cilat sipas saj po favorizojnë gjithnjë e më shumë interesat e Moskës.
Marrëdhëniet midis SHBA-së dhe Evropës u përkeqësuan pasi presidenti amerikan Donald Trump ra dakord me Putin për të siguruar naftë dizel dhe për të lehtësuar sanksionet deri në prill 2027, pa marrë asnjë koncesion nga Rusia.
Trump kërkoi zgjedhje të reja në Ukrainë, edhe pse ato janë të ndaluara gjatë luftës, dhe u ankua se presidenti ukrainas Volodymyr Zelensky është “më i vështirë për t’u bashkëpunuar” se sa Putin. Ndërkaq, Zelensky deklaroi se ndihet i tradhtuar nga Trump.
“Besoj se janë ndërmarrë hapa për ta bindur Ukrainën të kapitulojë”, tha Zelensky në një intervistë të fundit për “Bloomberg”.
Kalas foli për ngjarjet më të fundit gjatë fjalimit para parlamentit në Strasburg, ku disa eurodeputetë pretenduan se Europa nuk ka një strategji për paqen.
“Kjo nuk është e vërtetë”, u përgjigj Kalas, duke iu referuar një dokumenti që ajo e prezantoi para kryeqyteteve evropiane. Në të përmenden kërkesat që Europa pret që Moska t’i përmbushë në një marrëveshje të ardhshme.
“Nëse Rusia paraqet kërkesat e saj maksimaliste, ne duhet të paraqesim edhe tonat për të krijuar një ekuilibër në negociata. Gjithashtu, duhet të dërgojmë një mesazh të qartë për Rusinë: për gjithçka që e intereson, siç është heqja e sanksioneve, Europa duhet të jetë në tryezë sepse këto janë vendime evropiane.”
“Nuk do t’i japim këto gjëra falas. Nuk bëhet fjalë vetëm për arritjen e paqes, por që ajo paqe të jetë e qëndrueshme dhe e drejtë”, shtoi ajo.
Kalas akuzoi Rusinë se po rrezikon sigurinë e Detit të Zi me bllokadë ushtarake, përdor rezervat ushqimore si armë dhe përpiqet të shkaktojë një krizë globale urie. Rumania dhe Bullgaria raportuan së fundmi sulme me dronë rusë pranë ujërave të tyre territoriale.
Përfaqësuesja e lartë gjithashtu kritikoi Moskën për refuzimin e armëpushimit energjetik dhe për rritjen e bombardimeve ndaj Ukrainës para dimrit.
“Ukraina dëshiron paqe më shumë se kushdo tjetër, sepse është bombarduar për katër vjet dhe po hyn në vitin e pestë”, tha ajo.
“Edhe Europa dëshiron paqe. Nuk është e vërtetë që ne nuk e duam. I vetmi që nuk dëshiron paqe është Rusia. Le të jemi shumë të qartë në këtë.”
Kalas është një nga kritikët më të shquar evropianë të politikës së Trump ndaj Moskës. Javën e kaluar ajo tha për “Euronews” se marrëveshja për naftën dizel është një dhuratë për Putin.
Brukseli insiston se, pavarësisht mosmarrëveshjeve në rritje, bashkëpunimi me SHBA-në duhet të vazhdojë për të ndikuar në procesin e paqes dhe për të mbrojtur interesat e Ukrainës.
Përfaqësues të lartë nga Komisioni Evropian, NATO, Gjermania, Franca, Mbretëria e Bashkuar dhe Polonia mbërritën në Oslo për një raund të ri bisedimesh.
