Kryeministri polak pas humbjes së republikanëve në SHBA: E dua demokracinë
Kryeministri polak Donald Tusk përgëzoi fitoren e demokratëve në zgjedhjet e pjesshme në SHBA, duke thënë se demokracia ka fituar në Amerikë. Ai i dha edhe një këshillë presidentit amerikan Donald Trump që të mos abuzojë me të drejtën e vetos.
"Sot demokracia fitoi në Amerikë. E dua demokracinë", deklaroi Tusk në konferencën e përbashkët për shtyp me kryeministrin çek Andrej Babiš në Varshavë, transmeton agjencia polake e lajmeve PAP.
Duke iu referuar deklaratës së Trump se demokratët kanë bërë një punë të mirë, Tusk tha: "Këtë herë jam plotësisht dakord me të".
Kryeministri polak komentoi edhe paralajmërimin e Trump se pas humbjes së shumicës republikane në Kongres do të bëhet "zoti Veto".
"Këshilla ime do të ishte që të mos abuzojë me veton si mënyrë qeverisjeje", tha Tusk, duke iu referuar përvojës së qeverisë së tij me vetot presidenciale në Poloni.
Ai shprehu shpresën se ndryshimi i raportit të forcave në Kongresin amerikan do të kontribuojë në stabilizimin e situatës politike dhe të sigurisë në Evropën Qendrore dhe Lindore.
Kryeministri çek Andrej Babiš gjithashtu e vlerësoi fitoren e demokratëve si bindëse dhe shprehu shpresën që Trump do të përqendrohet në përfundimin e luftës në Ukrainë dhe konfliktit lidhur me ngushticën e Hormuzit.
Demokratët në zgjedhjet e mbajtura më 3 nëntor fituan shumicën në Dhomën e Përfaqësuesve dhe Senat, duke i hequr republikanëve kontrollin mbi Kongresin.
