Ministri rus i Mbrojtjes akuzon NATO-n, BE-në dhe Ukrainën për rritje të qëllimshme të tensioneve

Ministri rus i Mbrojtjes, Andrej Belousov, akuzoi NATO-n, Bashkimin Evropian dhe Ukrainën se qëllimisht po ashpërsojnë marrëdhëniet me Rusinë dhe Bjellorusinë, duke paralajmëruar gjithashtu për armatosjen e shpejtuar të vendeve evropiane.

"Situata ushtaro-politike rreth vendeve tona mbetet e vështirë. Po shohim një rritje të shpejtë të tensioneve dhe veprime agresive të Perëndimit ndaj Rusisë dhe Bjellorusisë. NATO, BE dhe regjimi në Kiev qëllimisht po ndjekin rrugën e eskalimit", deklaroi Belousov në një takim të përbashkët të përfaqësuesve të ministrive të mbrojtjes së Rusisë dhe Bjellorusisë, transmeton agjencia ruse TASS.

Ai vlerësoi se një rrezik i veçantë paraqet militarizimi i shpejtë i Evropës, e cila, sipas tij, po riorienton prodhimin e saj industrial për nevoja ushtarake dhe po përgatit infrastrukturë për vendosje të shpejtë të forcave të armatosura.

Deklaratat vijnë në një periudhë kur anëtarët evropianë të NATO-s po rrisin shpenzimet për mbrojtje dhe po forcojnë kapacitetet ushtarake për shkak të pasojave të sigurisë nga pushtimi rus i Ukrainës. NATO i paraqet këto masa si forcim të mbrojtjes dhe tërheqje, ndërsa Moska i konsideron ato kërcënim për sigurinë e saj.