Shojgu: Perëndimi përdor sanksione, kërcënime dhe shantazhe për të dobësuar Rusinë
Sekretari i Këshillit të Sigurisë së Rusisë, Sergej Shojgu, deklaroi sot se vendet perëndimore përdorin mekanizma të ndryshëm presioni ndaj Rusisë, nga propaganda dhe sanksionet ekonomike deri te kërcënimet ushtarake dhe shantazhet, me qëllim dobësimin e pozitës së saj ndërkombëtare dhe potencialit ekonomik.
Në një takim të dedikuar masave për parandalimin, siç u tha, të aktiviteteve shkatërruese të organizatave joqeveritare që veprojnë në territorin e Rusisë, Shojgu vlerësoi se vendet perëndimore përpiqen të zvogëlojnë reputacionin e Moskës në skenën ndërkombëtare.
"Për të zvogëluar reputacionin e Rusisë në skenën botërore dhe për të dobësuar potencialin e saj ekonomik dhe atë të industrisë së mbrojtjes, përdoren të gjitha mekanizmat e veprimit shkatërrues: propaganda e pandërgjegjshme rusofobe, sanksione të paligjshme dhe të shumta ekonomike, forcimi i forcave ushtarake pranë kufijve tanë, retorikë agresive, kërcënime të drejtpërdrejta dhe shantazhe", tha Shojgu, transmeton Sputnik.
Sipas tij, vendet perëndimore përpiqen të kufizojnë mundësitë e Rusisë për bashkëpunim të jashtëm ekonomik dhe politik, ndërsa, siç pretendon, ato përdorin edhe metoda të paligjshme.
Shojgu akuzoi Perëndimin për zbatimin e asaj që e quajti procedura "haptazi kriminale", duke përmendur sekuestrimin e dhunshëm të pronës, piraterinë, si dhe aktivitetet ekstremiste dhe terroriste.
Ai vlerësoi se në këto rrethana, Rusia duhet të veprojë parandalueshëm dhe të zhvillojë masa sistematike për mbrojtjen e interesave të saj.
"Ne kuptojmë planet e kundërshtarit dhe duhet të veprojmë parandalueshëm, duke menduar në kohë dhe duke zbatuar në mënyrë efektive kundërmasa gjithëpërfshirëse dhe sistematike", deklaroi ai.
Duke folur për politikën e vendeve evropiane, sekretari i Këshillit të Sigurisë së Rusisë vlerësoi se udhëheqësit e tyre kanë vendosur për militarizim dhe se, sipas tij, ata gjithnjë e më shumë përfaqësojnë interesat e kompanive të industrisë ushtarake.
Ai akuzoi politikanët evropianë se vendosin mbështetjen për Ukrainën dhe kundërshtimin ndaj Rusisë përpara nevojave të qytetarëve të tyre.
"Shumë prej tyre thonë hapur se interesat e qytetarëve të tyre janë në vend të dytë, ndërsa në vend të parë është vazhdimi dhe mbështetja e pafund për gjithçka që lidhet me regjimin nazist në Kiev, ose, thënë thjesht, gjithçka që lidhet me kundërshtimin ndaj Rusisë", tha Shojgu.
Ai gjithashtu deklaroi se shërbimet e inteligjencës së vendeve që Moska i konsideron armiqësore po intensifikojnë aktivitetet e tyre të drejtuara ndaj destabilizimit të kushteve socio-politike në rajonet ruse.
"Në kushte të një situate ndërkombëtare të tensionuar, të shkaktuar nga dobësimi i ndikimit të mbështetësve të globalizimit dhe formimi i një rendi botëror multipolar, vendet armiqësore vazhdojnë të ndjekin një politikë agresive anti-ruse", tha Shojgu.
Sipas vlerësimit të tij, shërbimet e huaja të inteligjencës po rrisin në mënyrë sistematike përpjekjet e tyre për të prishur stabilitetin në Rusi.
