Klekovski u vaksinua kundër gripit sezonal: Vaksinimi është masa më e mirë për parandalimin e kësaj sëmundjeje
Në Institutin e Shëndetit Publik, i cili është një nga pikat për imunizim kundër gripit sezonal, këtë mëngjes ndër qytetarët që morën vaksinën ishte edhe ministri i Shëndetësisë, Sasho Klekovski.
– Vaksinimi kundër gripit sezonal është masa më e mirë dhe më efektive për parandalimin e kësaj sëmundjeje. Pikërisht për këtë arsye sot me shembull personal theksova rëndësinë e mbrojtjes në kohë të shëndetit, veçanërisht te grupet e rrezikuara të popullsisë. Vaksinimi provuar ndalon shfaqjen e formave më të rënda, komplikacioneve dhe pasojave fatale nga kjo sëmundje. Është inkurajuese që brenda vetëm një jave mbi 55.000 qytetarë janë regjistruar për vaksinim. Sot filloi vaksinimi në të gjitha pikat nëpër shtet, prandaj bëj apel që nëse qytetarët nga grupet e rrezikuara ende nuk janë regjistruar për vaksinim falas në faqen vakcinacija.mk, ta bëjnë sa më shpejt, theksoi ministri.
Që nga 14 tetori, kur u hap formulari për regjistrim, deri sot për vaksinim falas kundër gripit sezonal janë regjistruar 55.535 qytetarë.
Mbi 60% e të regjistruarve janë persona mbi 65 vjeç, ndërsa rreth një e treta janë qytetarë me sëmundje kronike. Regjistrime janë evidentuar në të gjitha 31 pikat për vaksinim nëpër shtet, ndërsa më së shumti qytetarë janë regjistruar në Shkup, Bitola, Prilep, Strumicë dhe Tetovë. Vaksinimi filloi këtë mëngjes, ndërsa deri në mesditë janë vaksinuar 368 qytetarë.
Qytetarët e interesuar nga grupet e rrezikuara mund të regjistrohen për vaksinim falas kundër gripit sezonal në linkun vijues: https://vakcinacija.mk/mk/registration-flu. Me plotësimin e formularit në faqen, qytetarët regjistrohen për vaksinim direkt në sistemin Moj Termin. Më pas, sipas orarit të paraparë në planin e vaksinimit, do të marrin një mesazh SMS me informacion për datën dhe orën e saktë kur duhet të vaksinohen në pikën që do ta zgjedhin gjatë regjistrimit.
Vaksinimi falas kundër gripit sezonal është i dedikuar për grupet e mëposhtme të rrezikuara: persona mbi 65 vjeç, persona me sëmundje kronike, punonjës shëndetësorë, gra shtatzëna, si dhe fëmijë në moshë nga 6 muaj deri në 5 vjeç, njoftoi ministria.
