(Video) Rusët goditën një zonë banimi pranë Kharkiv; vdiqën adoleshentë

Të paktën tre persona kanë vdekur, ndërsa 25 janë plagosur në sulmin raketor rus të djeshëm mbi një zonë banimi në Pisoçin, një fshat pranë Kharkivit.

Policia kombëtare ukrainase njoftoi se mes të vdekurve kishte një djalë 16-vjeçar dhe dy gra, me moshë 19 dhe 51 vjeç. Raketa goditi një vend pranë një dyqani dhe ndërtesave banimi, raporton "Kyiv Independent".

Mes të plagosurve kishte edhe dy vajza, me moshë nëntë dhe 13 vjeç. Të gjithë të dëmtuarit u dërguan në spital; ashpërsia e plagëve të tyre ende nuk është bërë publike.

Sulme të reja në rajonin e Kharkivit
Sulmi në Pisoçin ndodhi në të njëjtën ditë kur Kharkivi, qyteti i dytë më i madh në Ukrainë, u godit me dy bomba të drejtuara. Një person vdiq dhe të paktën tetë u plagosën në sulmin mbi zonën urbane të Nemishljansk.

Presidenti ukrainas Volodymyr Zelensky theksoi rritjen e sulmeve ruse. "Vetëm këtë javë, rusët kanë lëshuar rreth 1,450 bomba ajrore, 75 raketa të llojeve të ndryshme dhe më shumë se 1,640 dronë sulmues, prej të cilëve rreth 60 për qind ishin me motor me reaktiv," tha Zelensky.

Rusia kryen rregullisht sulme mbi infrastrukturën civile në Ukrainë. Kharkivi dhe rajonet përreth janë objektiva të shpeshta për shkak të afërsisë së tyre me vijën e frontit.