(Video) U rrëzua një avion ushtarak pakistanez; vdiqën të dy pilotët

Një avion i vogël ushtarak për trajnimin e ushtrisë pakistaneze u rrëzua sot pranë qytetit Quetta në jugperëndim të Pakistanit, ku vdiqën të dy pilotët, njoftoi ushtria.

Sipas agjencisë AP, aksidenti ndodhi pranë Nawan Kili, në rajonin e Quetta – kryeqytetin e provincës Balochistan, që kufizohet me Afganistanin.

Bëhet fjalë për një avion të tipit „PAC MFI-17 Mushshak“ – një avion i vogël me një motor dhe propeler, i destinuar për trajnimin bazë të pilotëve ushtarakë. Në të ndodheshin një instruktor fluturimi dhe një pilot-kadet. Sipas informacioneve fillestare nga ushtria pakistaneze, shkaku i rrëzimit ishte një defekt teknik.

Nuk janë publikuar detaje të tjera për incidentin. Presidenti Asif Ali Zardari dhe kryeministri Shehbaz Sharif shprehën ngushëllime për familjet e pilotëve të ndjerë.

Rrëzimet e avionëve të trajnimit janë një dukuri relativisht e shpeshtë në Pakistan. Autoritetet rrallë publikojnë informacione për shkaqet, dhe raportet e hetimeve zakonisht nuk janë të disponueshme për publikun. Në qershor, një avion i forcave ajrore u rrëzua gjatë një stërvitjeje rutinë në veriperëndim të Pakistanit, ku gjithashtu vdiqën të dy pilotët.