17 persona arrestuar për shkelje të trafikut, vozitën pa leje dhe nën ndikimin e alkoolit
Gjatë 24 orëve të fundit, punonjësit e policisë në territorin e Maqedonisë kanë arrestuar 17 persona, ndërsa me një person tjetër është kryer bisedë zyrtare për shkak të dyshimit për kryerjen e veprës penale "ngasje e pakujdesshme e mjetit motorik".
Sipas informacioneve nga MPB-ja, dhjetë persona kanë drejtuar mjete pa kaluar provimin e vozitjes. Ndër ta ishte edhe një i mitur 14-vjeçar nga Vinica, i cili humbi kontrollin mbi mopedin dhe ra. Bisedë zyrtare është kryer edhe me një 19-vjeçar nga Velesi, i cili mori pjesë në një aksident trafiku me një motoçikletë pa targa dhe edhe dy mjete të tjera, megjithëse nuk kishte të drejtë të drejtonte mjet motorik.
Pesë persona janë kapur duke drejtuar nën ndikimin e alkoolit. Sasia më e lartë është matur te një person, ku u konstatua 3,35 promil alkool në gjak. Te të tjerët janë matur nga 1,55 deri në 2,17 promil.
Dy persona kanë drejtuar mjete pavarësisht ndalimit aktiv, dhe njëri prej tyre kishte marrë pjesë më parë edhe në një aksident trafiku. Në një nga rastet, një 53-vjeçar nga fshati Musinci, komuna Mogila, njëkohësisht drejtonte pa kaluar provimin e vozitjes dhe nën ndikimin e alkoolit, ku iu matën 2,92 promil.
MPB-ja informon se pas dokumentimit të plotë të rasteve do të paraqiten kallëzime penale përkatëse.
Ministria bën apel te qytetarët që të respektojnë rregullat e trafikut, të mos drejtojnë mjete pa leje drejtimi, nën ndikimin e alkoolit ose gjatë ndalimit aktiv. Apeli u drejtohet edhe prindërve që të mos lejojnë të miturit të drejtojnë mjete motorike para se të fitojnë të drejtën ligjore për këtë.
