Arratisja e Iva Mihajlovës kërkon hetim urgjent dhe përgjegjësi, thonë nga Lidhja Demokratike
Lidhja Demokratike kërkon përcaktim urgjent të përgjegjësisë për arratisjen e Iva Mihajlovës, zbardhjen e ndihmësve të mundshëm dhe përgjegjësi penale për të gjitha personat për të cilët do të përcaktohet se e kanë organizuar ose mundësuar atë.
„Mihajlova ishte e akuzuar për pjesëmarrje në aksident rrugor me pasoja vdekjeprurëse, dhe me arratisjen u bë e paarritshme për organet e drejtësisë. Drejtësia duhet të jetë e barabartë për të gjithë, pa privilegje dhe individë të paprekshëm.
Kërkojmë nga MPB-ja, Administrata Doganore dhe Prokuroria Publike të përcaktojnë se si ishte e mundur që ajo të largohej nga shteti dhe nëse në këtë kanë marrë pjesë ose kanë dështuar zyrtarë policorë dhe doganorë.
Veçanërisht shqetësuese është që arratisja ndodhi në momentin kur u pranua mundësia që gjendja e saj shëndetësore të vlerësohej edhe nga mjekë bullgarë. Kjo ngre dyshime nëse qëllimi ishte shmangia e një vlerësimi të pavarur mjekësor, i cili mund të jepte përgjigje në pyetjen nëse gjendja e saj ishte vërtetë kërcënuese për jetën dhe nëse vendimet e mëparshme gjyqësore ishin të justifikuara“, thonë nga Lidhja Demokratike.
„Duhet të hetohet edhe roli i avokatit, përfshirë pretendimet e tij për ekzistencën e ndihmësve, si dhe të përcaktohet se si Mihajlova arriti të arratisej pavarësisht masave për kufizimin e lëvizjes dhe pasaportave bullgare dhe maqedonase të sekuestruara.
Nëse përcaktohet se avokati ka marrë pjesë në organizimin ose mundësimin e arratisjes, kërkojmë që ai të mbajë përgjegjësi penale të përshtatshme, sipas ligjit. Profesioni i avokatit nuk duhet të jetë mbrojtje për veprime të paligjshme.
Lidhja Demokratike kërkon një hetim transparent, përcaktimin e gabimeve institucionale dhe përgjegjësi ligjore për të gjithë të përfshirët. Arratisja nuk duhet të nënkuptojë shmangie të drejtësisë, veçanërisht kur bëhet fjalë për një akuzë për aksident rrugor me pasoja vdekjeprurëse“, njoftoi Lidhja Demokratike.
