Filipçe nga marshimi i LSDM-së: Paraardhësit luftuan që të kemi shtet, ne duhet të luftojmë që të rinjtë të qëndrojnë në të
Kryetari i LSDM-së, Venko Filipçe, nga marshimi "Përballje. Luftë. E ardhme" në Prilep, me rastin e 85-vjetorit të Kryengritjes Popullore dhe luftës antifashiste, theksoi se brezi i sotëm ka detyrë historike të luftojë për një të ardhme ku të rinjtë do të qëndrojnë në Maqedoni dhe këtu do të ndërtojnë jetën e tyre.
"Para 85 vjetësh paraardhësit tanë luftuan që të kemi shtetin tonë. Brezi ynë duhet të luftojë që fëmijët të qëndrojnë dhe të jetojnë këtu në shtëpi. Dhe kjo është detyra jonë historike", tha Filipçe.
Ai theksoi se bankat e zbrazura të shkollës dhe numri i reduktuar i nxënësve të klasës së parë janë një alarm serioz për të ardhmen e shtetit, duke nënvizuar se Maqedonia nuk duhet të pajtohet me largimin e të rinjve.
"Sepse sot imazhi më i trishtë i Maqedonisë janë bankat e zbrazura të shkollës. Rreth 3000 nxënës më pak këtë vit. Ky është alarmi që duhet ta dëgjojmë të gjithë. Sepse një shtet pa të rinj nuk ka të ardhme. Ne nuk duhet të pajtohemi me këtë dhe nuk do të pajtohemi", theksoi kryetari i LSDM-së.
Filipçe theksoi se largimi nuk duhet të bëhet normalitet dhe se çdo i ri duhet të ketë perspektivë në atdheun e tij.
"Nuk pranojmë që largimi të bëhet normalitet, sepse izolimi nuk është opsion. Nuk pranojmë që në shekullin 21 të mos ketë ujë të pastër për pije. Nuk pranojmë që pushteti të mos ketë përgjigje dhe askush të mos ketë përgjegjësi. Dhe më së shumti nga të gjitha, nuk pranojmë që një brez i tërë të besojë se për të nuk ka vend në atdheun e vet. Sepse patriotizmi është mënyra se si njerëzit jetojnë sot dhe çfarë do t'u lëmë fëmijëve nesër. Dhe kjo është masa e politikës së suksesshme. Dhe pikërisht për këtë sot dua t'u drejtohem veçanërisht të rinjve. Ata që kanë 18, 20, 25 vjet. Brezi juaj sot ka një betejë tjetër. Beteja për të ardhmen. Ne jemi këtu ta udhëheqim atë për ju dhe me ju. Prandaj, detyra jonë e madhe kombëtare e ardhshme është e përbashkët. E ardhmja evropiane dhe mundësitë evropiane për çdo djalë dhe vajzë të re këtu në Maqedoni", tha Filipçe.
