(Foto) Nikoloski: Fillojmë ndërtimin e autostradës Bukojçani-Kërçovë, autostrada e gjashtë që ndërtohet në Maqedoni

Maqedonia fillon ndërtimin e një autostrade të re nga Bukojçani deri në Kërçovë, projekti i gjashtë që nis kjo Qeveri. Lidhja nga Kërçova deri në Bukojçan me një zgjidhje autostrade do t’i japë kuptim të plotë Korridorit 8, që do të thotë përfundim të plotë të korridorit dhe lidhje të plotë autostradale midis Shkupit dhe Ohrit, theksoi sot në vendosjen e gurthemelit të autostradës së re, zv/kryeministri dhe ministri i transportit, Aleksandar Nikoloski.

Sipas Nikoloskit, bëhet fjalë për një segment jashtëzakonisht të rëndësishëm që duhet të sigurojë një tërësi të lidhjes autostradale të pjesës perëndimore të shtetit, përmes Tetovës, Gostivarit, Kërçovës dhe Strugës, duke mundësuar lidhje të plotë të Korridorit 8.

– Këta 12 kilometra janë jashtëzakonisht të rëndësishëm dhe duhet t’i japin kuptim dhe tërësi lidhjes së përgjithshme autostradale, jo vetëm nga Shkupi deri në Ohër, por edhe të gjithë Korridorit 8. Me këtë lidhje autostradale, i gjithë korridori merr kuptim, tha Nikoloski.

Ai theksoi se aktivitetet ndërtimore fillojnë pikërisht në vendin ku përfundon autostrada Ohër – Kërçovë, nga ku traseja do të vazhdojë drejt Bukojçanit. Në të njëjtën kohë, në segmentin nga Bukojçani deri në Gostivar tashmë punohet intensivisht në ndërtimin e një zgjidhjeje autostrade.

"Bëhet fjalë për një terren malor, jashtëzakonisht të vështirë, terren që kërkon shumë njohuri, shumë përvojë dhe mendoj se kontraktuesit e zgjedhur, së bashku me mbikëqyrjen dhe mbështetjen teknike, do të mund të bëjnë një punë të shkëlqyer dhe jam i bindur se brenda afatit të parashikuar prej 4 vjetësh projekti do të përfundojë", theksoi zv/kryeministri Nikoloski.

Projekti parashikon ndërtimin e një autostrade moderne me dy korsi në secilën drejtim, me gjerësi prej 3.5 metrash secila, si dhe korsitë ndihmëse prej 2.75 metrash në të dyja anët. Shpejtësia e projektuar do të jetë nga 110 deri në 130 kilometra në orë.

"Bëhet fjalë për një detyrë jashtëzakonisht të vështirë që do ta kenë kontraktuesit, të cilët do të marrin mbështetje të plotë nga Qeveria, nga Ministria e Transportit dhe nga Ndërmarrja Publike për Rrugët Shtetërore", theksoi zv/kryeministri i Qeverisë, Aleksandar Nikoloski.

Ai falënderoi kryeministrin dhe theksoi se fillimi i ndërtimit është pjesë e vizionit zhvillimor të vendosur në vitin 2024, me të cilin shteti duhet të pozicionohet si një kryqëzim i rëndësishëm i dy korridoreve panevropiane – Korridori 8 dhe Korridori 10.

– Dua të falënderoj kryeministrin, sepse këto gjëra nuk janë rastësi, kjo është pjesë e vizionit që u vendos në vitin 2024 kur u formua kjo Qeveri. Ne vendosëm që shtetin ta zhvillojmë si një kryqëzim midis dy korridoreve panevropiane – Korridori 8 dhe Korridori 10. Maqedonia nuk ka dalje në det, por ka një pozicion gjeografik unik, i cili me investime të fuqishme në autostrada dhe hekurudha duhet të nënkuptojë përparim ekonomik për shumë breza që do të vijnë pas nesh, përfundoi ministri i transportit, Aleksandar Nikoloski.

Ndërtimi i segmentit Bukojçani – Kërçovë përbën një hap të rëndësishëm infrastrukturor drejt lidhjes më të mirë, transportit më të shpejtë dhe më të sigurt dhe forcimit të rolit strategjik të Maqedonisë në korridoret rajonale të transportit.