Pendarovski reagon ndaj akuzave: Nuk kam pasur lidhje biznesi me asnjë person që kam emëruar
Ish-presidenti Stevo Pendarovski hodhi poshtë akuzat e VMRO-DPMNE-së për një lidhje të pretenduar financiare dhe biznesi me një objekt ndërtimi në Shkup, ku investitori, sipas deklaratës së tij, është një person që shtatë vjet më parë ishte emëruar prej tij në një funksion të caktuar.
Duke reaguar në konferencën për shtyp të sotme të partisë në pushtet, Pendarovski vlerësoi se bëhet fjalë për fabrikim aferash dhe dezorientim politik.
"Konferenca e sotme e VMRO-DPMNE-së para një objekti ndërtimi në Shkup është një konfirmim i dezorientimit politik të asaj partie që çdo ditë fabrikon afera me një ritëm që nuk është parë që nga pavarësia deri sot. Pavarësisht nga absurditetet që u lexuan për një lidhje të pretenduar time financiare dhe biznesi me një objekt që po ndërton një person i cili shtatë vjet më parë ishte emëruar prej meje si president i atëhershëm i shtetit, dua të deklaroj këtë: Me përgjegjësi të plotë morale, materiale dhe penale, pohoj se asnjëherë nuk kam pasur, as sot nuk kam asnjë lidhje biznesi me asnjë person që në përputhje me kompetencat e mia kushtetuese dhe ligjore kam emëruar gjatë mandatit tim presidencial.
Kjo është, gjithashtu, shumë lehtë e verifikueshme nga institucionet që janë plotësisht nën kontrollin e partisë në pushtet, sigurisht, nëse ata duan ta bëjnë këtë. Duke ndjekur të njëjtën “logjikë”, pres që partia të mbajë sot një konferencë për shtyp para Pallatit të Bardhë dhe të pyesë liderin e saj nëse ndoshta ka qenë partner biznesi me rojen e tij që u arrestua nën dyshimin se për 50.000 euro dyshohet se ka zbuluar sekrete zyrtare.
Sigurisht, kjo metodologji e pervertuar për denoncimin e njerëzve mund të aplikohet edhe në një seri të tërë aferash kriminale ku në publik përmenden persona të emëruar drejtpërdrejt nga Mickoski ose bashkëpunëtorët e tij më të afërt, por për këtë më vonë. Së pari, zëdhënësi i partisë le të mbajë konferencën për shtyp që i kam propozuar. Sipas paraqitjes së sotme, “argumentet” tashmë i ka", thotë Pendarovski.
