Të njohura vendet që do të marrin pjesë në "Eurovision", Maqedonia kthehet pas katër vjet pauzë
Në edicionin e 71-të të Eurovisionit, i cili do të mbahet në maj 2027 në qytetin bullgar Burgas, do të konkurrojnë 36 vende. Lista e pjesëmarrësve është konfirmuar zyrtarisht, ndërsa gara do të zhvillohet në arenën "Burgas". Netët gjysmëfinale janë caktuar për 11 dhe 13 maj, ndërsa finalja e madhe do të mbahet më 15 maj. Organizatori i garës do të jetë televizioni publik bullgar BNT.
Është konfirmuar pjesëmarrja e 36 vendeve: Shqipëria, Armenia, Australia, Austria, Azerbajxhani, Belgjika, Bullgaria, Kanadaja, Kroacia, Qipro, Danimarka, Estonia, Finlanda, Franca, Gjeorgjia, Gjermania, Greqia, Izraeli, Italia, Letonia, Lituania, Luksemburgu, Malta, Moldavia, Mali i Zi, Maqedonia e Veriut, Norvegjia, Polonia, Portugalia, Rumania, San Marino, Serbia, Suedia, Zvicra, Ukraina dhe Mbretëria e Bashkuar.
Televizioni publik kanadez CBC/Radio-Canada do të marrë pjesë për herë të parë në Eurovision, pasi në korrik 2026 u bë anëtar i plotë i Bashkimit Evropian të Transmetuesve (EBU).
Maqedonia gjithashtu kthehet në garë pas një mungese katërvjeçare. Pjesëmarrja e fundit maqedonase ishte në vitin 2022.
Spanja dhe Sllovenia ende nuk e kanë konfirmuar pjesëmarrjen e tyre. EBU, për shkak të kompleksitetit të situatës, u ka zgjatur afatin televizioneve publike RTVE dhe RTVSLO deri në dhjetor për të marrë vendim.
Në të dy netët gjysmëfinale do të performojnë gjithsej 31 vende. Gjysmëfinalja e parë do të mbahet të martën, më 11 maj, dhe e dyta të enjten, më 13 maj.
Bazuar në votat e jurisë dhe publikut, nga secila gjysmëfinale në finale do të kalojnë dhjetë këngë.
Këtyre 20 vendeve në finale do t'u bashkohen përfaqësuesit e Bullgarisë si vendi mikpritës, si dhe Franca, Gjermania, Italia dhe Mbretëria e Bashkuar, të cilat kanë siguruar kualifikim të drejtpërdrejtë në finale.
Finalja e madhe do të mbahet të shtunën, më 15 maj, ndërsa shorti për përcaktimin e rendit të vendeve pas netëve gjysmëfinale do të zhvillohet në janar 2027 në Burgas.
Shitja e biletave për nëntë programe në total, duke përfshirë tre netët konkurruese dhe gjashtë provat e hapura për publikun, do të fillojë në fillim të vitit 2027.
Të gjithë ata që dëshirojnë të blejnë bileta do të duhet të regjistrohen paraprakisht në Eurofan, programi zyrtar falas për anëtarësimin e fansave të Eurovisionit.
Detajet për shitjen do të publikohen në faqen zyrtare të internetit të garës.
Më shumë informacione për pamjen e skenës, prezantuesit dhe ngjarjet shoqëruese në Burgas do të bëhen të njohura gjatë muajve në vijim.
