Zbulohet një dinosaurus që ushqehej me fruta, jetonte para 66 milionë vjetësh
Shkencëtarët zbuluan një lloj të ri dinosauri që jetonte rreth 66 milionë vjet më parë dhe, ndryshe nga paraardhësit e tij mishngrënës, me shumë gjasa ushqehej kryesisht me fruta. Zbulimi, i publikuar në revistën shkencore „Nature Communications“, ofron njohuri të reja për ushqimin dhe evolucionin e kafshëve parahistorike.
Fosilet u gjetën në formacionin gjeologjik Hell Creek në SHBA. Lloji i sapozbuluar, i quajtur *Infernogallus jamesi*, ishte një dinosaurus i vogël me pendë, me madhësinë e një gjel deti, peshonte rreth 12 kilogramë dhe ishte afërsisht një metër e gjysmë i gjatë.
Falë kafkës së ruajtur mirë, shkencëtarët zbuluan se nofulla e tij ishte e përshtatur për të përtypur ushqim të butë, veçanërisht fruta. Me ndihmën e tomografisë kompjuterike, u konstatua se ai mund të lëvizte nofullën e poshtme përpara-mbrapa, ngjashëm me papagajtë e sotëm që ushqehen me fruta.
Sipas studiuesve, kjo anatomi i mundësonte të ndante pjesën e butë të brendshme të frutave nga farat.
"Zbulimi tregon se dieta e dinosaurëve ndoshta ishte shumë më e larmishme sesa mendohej më parë", deklaroi studiuesi Thomas Dajon nga Muzeu Mbretëror i Ontarios.
Shkencëtarët besojnë se këta dinosaurë mund të kenë pasur një rol të rëndësishëm në përhapjen e farave dhe zhvillimin e bimëve me lule gjatë periudhës së kredës, megjithëse kjo ende duhet të konfirmohet.
