Papa kundër dënimit me vdekje, SHBA-të njoftuan ekzekutimin drejtpërdrejt

Papa Lavi XIV sot vlerësoi se dënimi me vdekje është "i papranueshëm", me rastin e Ditës Botërore kundër dënimit me vdekje, ndërsa SHBA-të njoftuan transmetimin e drejtpërdrejtë të ekzekutimit të një ish-anëtari të ushtrisë amerikane, transmeton agjencia AP.

Në një postim në rrjetin social X, papa iu referua mësimit të Kishës Katolike, të ndryshuar nga paraardhësi i tij, Papa Françesku, sipas të cilit dënimi me vdekje cenon dinjitetin e lindur të njeriut.

"E mira e përgjithshme mund të mbrohet, dhe kërkesat e drejtësisë të përmbushen edhe pa përdorur dënimin me vdekje", tha papa, duke shtuar se sistemet moderne të burgjeve mundësojnë mbrojtjen e qytetarëve pa i hequr plotësisht të dënuarve mundësinë për pendim.

Mesazhi i tij vjen pasi Departamenti amerikan i Mbrojtjes njoftoi se ekzekutimi i Nidal Malik Hasan, i dënuar për sulmin në bazën ushtarake Fort Hud në vitin 2009, do të transmetohet drejtpërdrejt.

Hasan, i cili është dënuar për vrasjen e 13 personave dhe plagosjen e 32 të tjerëve, duhet të ekzekutohet me pushkatim më 3 dhjetor.

Edhe pse papa nuk komentoi drejtpërdrejt këtë rast, sekretari i Shtetit të Vatikanit, kardinali Pietro Parolin, e vlerësoi ekzekutimin publik të planifikuar si "të papranueshëm".

Papa Françesku në vitin 2018 ndryshoi mësimin zyrtar të Kishës Katolike, duke shpallur dënimin me vdekje të papranueshëm në çdo rrethanë.