Bashkëpunim i suksesshëm i Bankës Popullore dhe CEF për forcimin e aftësive për transferimin e njohurive mes bankave qendrore
Banka Popullore, në bashkëpunim me Qendrën për Ekselencë në Financë (CEF), organizuan një punëtori me temë: „Trajnim për trajnerë – ndërtimi i aftësive për mbështetjen e shkëmbimit të njohurive mes bankave qendrore“.
„Programet e trajnimit me cilësi të lartë dhe shkëmbimi institucional i njohurive janë motorët kryesorë të zhvillimit organizativ. Përmes kultivimit të një kulture të mësimit të vazhdueshëm dhe shkëmbimit ndërkufitar të njohurive, mund të promovojmë praktikat më të mira dhe të ndërtojmë partneritete institucionale të qëndrueshme“, theksoi nënguvernatorja Arljinda Hasani Sinani, e cila përshëndeti pjesëmarrësit në punëtori ku marrin pjesë përfaqësues nga Banka Popullore dhe nga bankat qendrore dhe institucionet financiare në rajon. Pjesëmarrësit patën mundësinë të debatojnë mbi tema me interes të përbashkët, duke përfshirë parimet bashkëkohore të të mësuarit, dëgjimin aktiv, përdorimin efektiv të tregimit të historive dhe aplikimin e qëllimshëm të zërit, gjuhës së trupit dhe hapësirës.
„Bankat qendrore dhe institucionet financiare janë organizata të drejtuara nga njohuritë. Ne analizojmë çdo ditë lëvizjet ekonomike, ndjekim trendet inflacioniste, efektet e politikave makroprudenciale dhe ndryshimet rregullatore. Megjithatë, posedimi i njohurive thelbësore është vetëm një pjesë e detyrës, dhe po aq e rëndësishme është aftësia për të transmetuar atë ekspertizë qartë dhe në mënyrë efektive, si brenda institucioneve, ashtu edhe para publikut“, vuri në dukje Hasani Sinani, duke shprehur falënderime për Qendrën për Ekselencë në Financë (CEF) për bashkëpunimin e suksesshëm shumëvjeçar, i cili konfirmon angazhimin e përbashkët për forcimin e kapaciteteve në të gjithë rajonin. Ajo theksoi se bashkëpunimi ka një rol kyç në forcimin e lidhjeve institucionale ndërmjet vendeve të rajonit për zgjidhje më efikase të sfidave të përbashkëta.
Nga CEF u theksua se banka jonë qendrore është një shembull i shkëlqyer për shumë institucione në rajon për mënyrën se si duhet të funksionojë një qendër e vërtetë e njohurive. U theksua se Banka Popullore investon vazhdimisht në ndërtimin e kapitalit njerëzor me cilësi të lartë, si dhe në përmirësimin e njohurive dhe aftësive të punonjësve, që është kusht paraprak për rritjen e institucioneve dhe vendeve në mënyrë të qëndrueshme, të zgjuar dhe gjithëpërfshirëse.
CEF është një institucion edukativ për trajnime në fushën e financave publike në Evropën Juglindore dhe është një nga partnerët kryesorë të Bankës Popullore në shkëmbimin e njohurive dhe përvojës profesionale në vitet e fundit. Banka Popullore do të vazhdojë të zhvillojë bashkëpunimin me CEF dhe me institucionet dhe organizatat ndërkombëtare të tjera që ofrojnë platforma për shkëmbimin e përvojave dhe njohurive mes bankave qendrore dhe institucioneve financiare.
